អ៊ីរ៉ង់បានចោទប្រកាន់សហរដ្ឋអាមេរិកកាលពីថ្ងៃអង្គារ២៧​​​ឧសភា​​​សប្ដាហ៍នេះ​ថា «ជាការរំលោភយ៉ាងច្បាស់លាស់លើបទឈប់បាញ់» រវាងប្រទេសទាំងពីរ បន្ទាប់ពីអាមេរិកបានចាប់ផ្តើមអ្វីដែលខ្លួនហៅថាការវាយប្រហារការពារខ្លួន​ ​ដោយ​គំរាមកំហែងរំខានដល់ការចរចាកាន់តែខ្លាំងក្នុងការ​​បញ្ចប់សង្គ្រាម។

មន្ត្រីអាមេរិកពីររូបបាននិយាយថា ការវាយប្រហារដោយយោធារបស់អាមេរិកគឺជាការឆ្លើយតបដោយផ្ទាល់ទៅនឹងអ្វីដែលពួកគេពិពណ៌នាកាលពីថ្ងៃអង្គារថាជាការបាញ់មីស៊ីល ​យានដ្រូន​ និងទូកតូចៗរយៈពេល២៤ ម៉ោងធ្វើឡើងដោយកងឆ្មាំបដិវត្តន៍អ៊ីស្លាមអ៊ីរ៉ង់ IRGC នៅជិតច្រកសមុទ្រ Hormuz។​​​​​

មន្ត្រីទាំងនោះបាននិយាយថា កងកម្លាំង IRGC បានបាញ់មីស៊ីលពីដីទៅលើ​​អាកាសជាច្រើនគ្រាប់ ខណៈសហរដ្ឋអាមេរិកមានយន្តហោះកំពុងហោះហើរនៅក្នុងតំបន់នោះ។ ពួកគេបាននិយាយថា គ្មានយន្តហោះអាមេរិកណាមួយត្រូវបានវាយប្រហារនោះទេ។ មន្ត្រីទាំងនោះបាននិយាយថា យានដ្រូន​​ និងទូកតូចៗទាំងនោះមានសមត្ថភាពដាក់មីនដែលអាចគំរាមកំហែងដល់នាវា​​ និងយន្តហោះរបស់សហរដ្ឋអាមេរិក។

មន្ត្រីម្នាក់បាននិយាយថា ការវាយប្រហាររបស់សហរដ្ឋអាមេរិកគឺ «មានកម្រិតណាស់» និង «ច្បាស់លាស់ណាស់»។

ការវាយប្រហារទាំងនេះបានកើតឡើង ខណៈ​លោក Marco Rubio រដ្ឋមន្ត្រីការបរទេសអាមេរិក បានប្រាប់ក្រុមអ្នកសារ​​ព័ត៌មាននៅក្នុងប្រទេសឥណ្ឌាថា កិច្ចព្រមព្រៀងមួយអាចត្រូវបានបញ្ចប់ក្នុងរយៈពេល «ពីរបីថ្ងៃទៀត​​» ហើយថា ក្រុម​អ្នកចរចាបាន​​​បំបែក​ «ការមិនចុះសម្រុងគ្នាលើពាក្យមួយ និង​ប្រយោគមួយ​»។

កងកម្លាំង​ឆ្មាំ​បដិវត្តន៍​អ៊ីរ៉ង់​ IRGC ​បាននិយាយកាលពីថ្ងៃអង្គារ​ថា​ ​កងកម្លាំង​​ការពារ​ដែន​អាកាសរបស់ខ្លួន​ ​បានបាញ់ទម្លាក់​​​​​យានដ្រូន MQ-9 Reaper មួយគ្រឿង​​ របស់អាមេរិក​​​​​ក្នុងដែន​អាកាស​របស់ប្រទេសនេះ ៕