ភ្នំពេញ៖ នៅថ្ងៃទី២០ ខែឧសភា ឆ្នាំ២០២២ ឯកឧត្តមបណ្ឌិត ហ៊ុន ម៉ាណែត ប្រធានក្រុមប្រឹក្សាភិបាលសមាគមគ្រូពេទ្យស្ម័គ្រចិត្តយុវជនសម្ដេចតេជោ(TYDA)​បានចុះអនុស្សារណៈយោគយល់ជាមួយអង្គការមូលនិធិនគរទេព ។

ក្នុងពិធីនោះ ឯកឧត្តមបណ្ឌិត ហ៊ុន ម៉ាណែត សូមថ្លែងអរគុណចំពោះអង្គការមូលនិធិនគរទេព ដែលចុះអនុស្សារណៈយោគយល់ ដើម្បីចូលរួមចំណែកយ៉ាងសំខាន់​ក្នុង​សកម្មភាពមនុស្សធម៌​ ដើម្បីបុព្វហេតុប្រជាពលរដ្ឋតាមរយៈការចុះពិនិត្យ ​និងព្យាបាលប្រជាពលរដ្ឋដោយឥតគិត​ថ្លៃ​នៅ​ទូទាំងប្រទេស។

ឯកឧត្តមបណ្ឌិត បន្ដថា សមាគមគ្រូពេទ្យស្ម័គ្រចិត្តយុវជនសម្ដេចតេជោ(TYDA) និង​អង្គការមូល​និធិនគរទេព ​មានបេសកកម្ម​ស្រដៀងគ្នា​ក្នុងជួយសង្គ្រោះជីវិត​មនុស្ស​តាម​រយៈការ​ផ្ដល់​សេវាសុខ​ភាព​ជូនប្រជាពលរដ្ឋ។ ជាក់ស្ដែងយើងបានរួមគ្នាប្រយុទ្ធប្រឆាំងជំងឺកូវីដ-១៩ តាមរយៈការរៀបចំ​មន្ទីរពេទ្យហ្លួងម៉ែ ដើម្បីសង្គ្រោះបន្ទាន់ និងព្យាបាលអ្នកជំងឺកូវីដ-១៩។ ការផ្ដល់ការគាំទ្រនេះ បាន​ធ្វើឱ្យស្ថានភាពពេលបច្ចុប្បន្ននេះខុសប្លែកពីស្ថានភាពកាលពីឆ្នាំកន្លងទៅ ធ្វើឱ្យប្រជាពលរដ្ឋរីករាយ​នៅក្នុងពិធីបុណ្យចូលឆ្នាំថ្មីប្រពៃណីជាតិខ្មែរ ដោយមិនមានភាពភ័យខ្លាចនឹងជំងឺកូវីដ-១៩ ធ្វើឱ្យ​ប្រជាពលរដ្ឋ​មានជំនឿជឿជាក់លើការដឹកនាំរបស់ប្រមុខរាជរដ្ឋាភិបាលកម្ពុជា​ដែលមាន​សម្តេចតេជោ ហ៊ុន សែន ជានាយករដ្ឋមន្ត្រី។

ឯកឧត្តមបណ្ឌិត ហ៊ុន ម៉ាណែត បានបញ្ជាក់ទៀតថា សមាគមគ្រូពេទ្យស្ម័គ្រចិត្តយុវជន​សម្តេចជោគ ​(TYDA) ​គឺមានគោលការណ៍០៣ នៅក្នុងការអនុវត្តកិច្ចការមនុស្សធម៌​ ដើម្បី​បុព្វហេតុ​ជួយ​ដល់ប្រជាពលរដ្ឋ៖ ១- ការផ្ដល់ផលប្រយោជន៍ជូនប្រជាពលរដ្ឋតាមរយៈការព្យាបាលឥតគិតថ្លៃ និងបញ្ជូនមកវះកាត់ និងព្យាបាលបន្តនៅរាជធានីភ្នំពេញក្រោមការឧបត្ថម្ភថ្លៃថ្លារបស់សម្ដេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិតប៊ុនរ៉ានីហ៊ុនសែន ដើម្បីផ្តល់ក្តីសង្ឃឹម ស្នាមញញឹម និងក្តីសុខរបស់ប្រជាពលរដ្ឋ។

២-ដើម្បីប្រមូលផ្ដុំ និងផ្តល់ឱកាសដល់កម្លាំងស្ម័គ្រចិត្ត ដែលមានជំនាញ ទឹកចិត្ត ឆន្ទៈដើម្បី​ចូលរួម​ធ្វើសកម្មភាពមនុស្សធម៌ ដើម្បីបុព្វហេតុសង្គមតាមរយៈការចុះពិនិត្យ​និងព្យាបាលជូនប្រជាពលរដ្ឋ​ដែលគិតថ្លៃនៅទូទាំងប្រទេស។

៣-ផ្ដល់លទ្ធភាព ការបណ្ដុះបណ្ដាល​សមត្ថភាពដល់​សមាជិក ​និងក្រុមការងារ ដើម្បីអភិវឌ្ឍន៍ខ្លួនឲ្យ​កាន់​តែរីកចម្រើនក្នុងការយកជំនាញ​បច្ចេកទេសព្យាបាល​ជូនប្រជាពលរដ្ឋ និងចូលរួម​អភិវឌ្ឍន៍​វិស័យសុខាភិបាលនៅកម្ពុជា៕