អ៊ុយក្រែន៖ នៅក្រោមសំឡេងស៊ីរ៉ែន និងសំឡេងផ្ទុះ ប្រជាជននៅទីក្រុង Kramatorsk បានមកដល់តាមរថយន្ត និងតាមរថយន្តក្រុង ឬដោយថ្មើរជើងមកកាន់មជ្ឈមណ្ឌលចែកចាយជំនួយដល់ពលរដ្ឋមួយចំនួន ដែលនៅតែរស់នៅក្នុងទីក្រុងស្ទើរតែគ្មានមនុស្ស។
អ្នកស្ម័គ្រចិត្តមកពីអង្គការសប្បុរសធម៌បានរៀបចំស្បៀងអាហារ ផលិតផលអនាម័យ និងថ្នាំពេទ្យ ហើយបានផ្តល់ឱ្យពួកគេដែលបានមកប្រមូលផ្តុំគ្នានៅខាងក្រៅអគារ។ លោក Ella Vinnikova ប្រធានសាលាបណ្ដុះបណ្ដាលដែលកំពុងស្ម័គ្រចិត្តនៅមជ្ឈមណ្ឌលចែកចាយជំនួយបានពន្យល់ថា ប្រសិនបើមានជនពិការក្នុងគ្រួសារ ឬមានអ្នកចូលនិវត្តន៍ដែលពួកគេត្រូវទុកចោលដោយគ្មានប្រាក់សោធន និងអ្នកបាត់បង់ការងារធ្វើ អ្នកទាំងនេះនឹងទទួលបានការគាំទ្រ។ ទីក្រុង Kramatorsk បានរងការវាយប្រហារដោយកងកម្លាំងរុស្ស៊ីអស់ជាច្រើនសប្ដាហ៍។ ការផ្ទុះបានធ្វើឲ្យកក្រើកទីក្រុងកាលពីថ្ងៃអង្គារម្សិលមិញ បណ្ដាលឲ្យមនុស្សយ៉ាងហោចណាស់ម្នាក់បានស្លាប់ និងបីនាក់រងរបួស នៅពេលគ្រាប់មីស៊ីលបានវាយប្រហារលើទីក្រុងនៅភាគខាងកើត ប្រទេសអ៊ុយក្រែន។
ស្ទើរតែ ៧០% នៃពលរដ្ឋរស់នៅក្នុងទីក្រុងបានភៀសខ្លួនដោយសារតែជម្លោះ ដោយស្វែងរកកន្លែងមានសុវត្ថិភាពជាងដើម្បីរស់នៅនៅភាគខាងលិចប្រទេស ឬចេញទៅក្រៅប្រទេស។ ហាង និងឧស្សាហកម្មនានាបានបិទដែលធ្វើឱ្យពិបាកក្នុងការទិញផលិតផល និងធ្វើឱ្យមនុស្សរាប់ពាន់នាក់គ្មានការងារធ្វើ។ រុស្ស៊ីកំពុងវាយលុកក្នុងទីក្រុង និងទីប្រជុំជននៅតំបន់ឧស្សាហ៍កម្មភាគខាងកើតរបស់អ៊ុយក្រែន ហើយបានដាក់កម្លាំងបន្ថែមចូលក្នុងប្រទេសនេះ។ រុស្ស៊ីបានបង្កើនការវាយប្រហារនៅតាមបណ្ដោយព្រំដែនរាប់រយគីឡូកាលពីថ្ងៃអង្គារ ជាអ្វីដែលមន្ត្រីទាំងសងខាងបានចាត់ទុកថាជាដំណាក់កាលថ្មីនៃសង្គ្រាម៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
