​ភ្នំពេញ៖ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំនៃក្រសួងពាណិជ្ជកម្ម និងអង្គការស្បៀង និងកសិកម្មសហប្រជាជាតិប្រចាំប្រទេសកម្ពុជា បានជួបពិភាក្សាគ្នា ដើម្បីបង្កើនកិច្ចសហការ និងភាពជាដៃគូ ក្នុងការរៀបចំប្រព័ន្ធត្រួតពិនិត្យម្ហូបអាហារឱ្យកាន់តែល្អប្រសើរ ចាប់ពីកសិដ្ឋានដល់តុអាហារ។

ឯកឧត្ដម ឌឹម ថេង អគ្គនាយករង នៃអគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង និង​បង្ក្រាប​ការ​ក្លែងបន្លំ ​មានប្រសាសន៍ប្រាប់ទូរទស្សន៍ព័ត៌មានប៊ីធីវីថា ក្នុងឱកាសទទួលជួបកញ្ញា រេប៊ែកា ប៊ែល (Ms. Rebekah Bell) ​តំណាងអង្គការស្បៀង និងកសិកម្មសហប្រជាជាតិ​ប្រចាំ​ប្រទេស​កម្ពុជា ​កាលពីថ្ងៃទី១៩ មេសា ឆ្នាំ២០២២កន្លងទៅ បាន​ពិភាក្សាគ្នា​ក្នុងការរៀបចំប្រព័ន្ធត្រួត​ពិនិត្យ​ម្ហូបអាហារ​ឱ្យបានកាន់តែល្អប្រសើរឡើងថែមទៀត ​ដើម្បីធានាថា ផលិតផលម្ហូប​អាហារ​មាន​គុណភាព​ សុវត្ថិភាព ​អនាម័យ​ល្អស្របតាម​ ស្តង់ដាអន្តរជាតិ និងជាពិសេសក៏មានការ​ពិភាក្សា​ពាក់ព័ន្ធ​នឹង «National Food Control Assessment» ដែលជា​គម្រោងយុទ្ធសាស្រ្តក្នុងការបង្កើន​សុវត្ថិភាព​ម្ហូបអាហារ​នៅក្នុងប្រទេសកម្ពុជា ​ដោយសហភាពអឺរ៉ុប។

ពាក់ព័ន្ធប្រធានបទខាងលើ ប្រជាពលរដ្ឋរស់នៅរាជធានីភ្នំពេញ បានលើកឡើងថា ការទិញម្ហូប​អាហារ ​ដើម្បីទទួលទានសព្វថ្ងៃ ​នៅមានការព្រួយបារម្ភតិចតួច ដោយសារកត្តា​អនាម័យ។ ពួកគាត់​បានឲ្យដឹងទៀតថា ​រាល់ចំណីម្ហូបអាហារដែលទទួលទាន​នៅក្រៅផ្ទះម្តងៗ ទាល់តែស្គាល់​ប្រភព​ច្បាស់ ទើបហ៊ាន​ទិញយកមក ​ទទួលទាន ​ដោយសារបារម្ភពីកង្វះអនាម័យ។ ​ចំពោះបន្លែ និង​ត្រីសាច់​នៅ​តាមទីផ្សារវិញ ពួកគាត់បាន​ លើកឡើងស្រដៀងគ្នា ក៏មិនសូវមានការព្រួយ​បារម្ភច្រើន​ដូចពីមុនៗដែរ ដោយសារឃើញមានមន្រ្តី ​ជំនាញៗចុះ​ត្រួតពិនិត្យជា​ញឹកញាប់ ​មិនថា​ក្នុងផ្សារនានា និងតាមបណ្តាម៉ាតជាដើម​ អំពីទំនិញដាក់លក់ប្រចាំថ្ងៃ។

ឯកឧត្ដម ឌឹម ថេង បានអះអាងថា គិតមកទល់បច្ចុប្បន្ននេះ ​ក្រុមមន្រ្តីជំនាញៗ ក៏ដូជាក្រសួង និង​ស្ថាប័នពាក់ព័ន្ធ នៅតែបន្តសហការគ្នា ក្នុងការដោះស្រាយបញ្ហា​ប្រឈម​នានា​អំពីសុវត្ថិភាពចំណី​ម្ហូបអាហារ ​ជាពិសេស​រដ្ឋាភិបាលកម្ពុជា បានកំពុងរៀបចំ និងគ្រោងដាក់ឲ្យអនុវត្តផ្លូវ​ការ​លើច្បាប់​ស្តីពីសុវត្ថិភាពម្ហូបអាហារ ​នៅក្នុងឆ្នាំ ២០២២នេះ ​ខណៈច្បាប់នេះ ​ត្រូវបានរំពឹងថា នឹងរួមចំណែក​ជំរុញកំណើនសេដ្ឋកិច្ចជាតិ ​តាមរយៈភាពទាក់ទាញអ្នកវិនិយោគ ​និងកំណើនភ្ញៀវទេសចរ។

ច្បាប់ស្តីពីសុវត្ថិភាពម្ហូបអាហារ មានគោលបំណងបង្កើតប្រព័ន្ធសុវត្ថិភាពម្ហូបអាហារ សម្រាប់ ការពារសុខភាព មនុស្ស ​និងអ្នកប្រើប្រាស់តាមរយៈការទប់ស្កាត់ ការគ្រប់គ្រង និងលុបបំបាត់​ការ​បំពុល និងគ្រោះថ្នាក់ដែលបណ្តាលមកពីម្ហូបអាហារ៕អត្ថបទ៖ ឈិត បូរ៉ាវី