នាយករដ្ឋមន្ត្រីអ៊ីរ៉ាក់ លោក Ali al-Zaidi កាលពីថ្ងៃពុធ បានជំរុញឲ្យក្រុមប្រដាប់អាវុធទាំងអស់ នៅក្នុងប្រទេសនេះ ធ្វើប្រតិបត្តិការក្រោមអំណាចរបស់រដ្ឋ។ នេះបើយោងតាមការិយាល័យប្រព័ន្ធផ្សព្វផ្សាយរបស់ លោក al-Zaidi។

ការអំពាវនាវរបស់លោក al-Zaidi បានកើតឡើងជាការឆ្លើយតបទៅនឹងសេចក្តីថ្លែងការណ៍មួយដែលចេញដោយការិយាល័យរបស់បព្វជិតស៊ីអ៊ីតអ៊ីរ៉ាក់ លោក Muqtada al-Sadr មេដឹកនាំចលនាជាតិស៊ីអ៊ីត ដែលបានប្រកាសបំបែកសាខាប្រដាប់អាវុធរបស់ខ្លួន គឺ Saraya al-Salam ចេញពីចលនានេះ និងបានបញ្ជាឲ្យបុគ្គលិករបស់ខ្លួន ធ្វើសមាហរណកម្មទៅក្នុងរដ្ឋ។

ដោយសរសើរចលនានេះ លោក al-Zaidi បានចាត់ទុកគំនិតផ្តួចផ្តើមនេះថា ជាជំហានដ៏សំខាន់មួយឆ្ពោះទៅរកការពង្រឹងស្ថិរភាពផ្ទៃក្នុង ដោយពង្រឹងគោលការណ៍នៃការរឹតបន្តឹងអាវុធចំពោះរដ្ឋ និងគាំទ្រកងកម្លាំងសន្តិសុខ។ នេះបើយោងតាមសេចក្តីថ្លែងការណ៍របស់ការិយាល័យប្រព័ន្ធផ្សព្វផ្សាយរបស់លោក al-Zaidi។

លោក al-Zaidi ក៏បានអំពាវនាវឲ្យក្រុមប្រដាប់អាវុធទាំងអស់ដើរតាម «មាគ៌ាជាតិដែលមានការទទួល ខុសត្រូវ និងធ្វើប្រតិបត្តិការក្រោមឆត្ររបស់រដ្ឋ» ដោយសង្កត់ធ្ងន់ថា រដ្ឋគឺជាអាជ្ញាធរតែមួយគត់ដែលមានសិទ្ធិផ្តាច់មុខក្នុងការគ្រប់គ្រងអាវុធ និងអនុវត្តច្បាប់៕