រតនគិរី៖ មន្រ្តីជំនាញនៃក្រសួងសុខាភិបាល នៅថ្ងៃទី២០ ខែមេសានេះ បានឱ្យដឹងថា ភូមិចំនួន២២ ក្នុងខេត្តរតនគិរី គ្រោងនឹងលុបបំបាត់ជំងឺគ្រុនចាញ់ ក្នុងពេលឆាប់ៗខាងមុខនេះ។

លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស ឯកឧត្តម ប៉ាប្លូ កាង​ ឯកអគ្គរដ្ឋទូត​អូស្ត្រាលី​ប្រចាំកម្ពុជា​ លោកស្រី វេជ្ជបណ្ឌិត លី អាយលែន​ តំណាងអង្គការសុខភាពពិភពលោក ប្រចាំប្រទេសកម្ពុជា និងលោកស្រីវេជ្ជបណ្ឌិត ហ្វារូហ្វ ហ្វូយូហ្សាត តំណាងអង្គការ​UNICEFប្រចាំប្រទេសកម្ពុជា រួមទាំងមន្រ្តីពាក់ព័ន្ធមួយចំនួនទៀត​ នៅព្រឹកថ្ងៃទី២០ ខែមេសានេះ បានអញ្ជើញទស្សនកិច្ចសហគមន៍គ្រុនចាញ់​ នៅស្រុកវឺនសៃ​ ខេត្តរតនគិរី។

លោកជំទាវវេជ្ជបណ្ឌិត ឱ វណ្ណឌីន បានវាយតម្លៃខ្ពស់ចំពោះការងារលុបបំបាត់​ជំងឺគ្រុនចាញ់​នៅ​ខេត្តរតនគិរី ​មានការថយចុះគួរឱ្យកត់សម្គាល់។ បច្ចុប្បន្ន ខេត្តរតនគិរី នៅសល់តែ ២២ភូមិទៀត​ប៉ុណ្ណោះ ដែលមានអ្នកជំងឺ​គ្រុនចាញ់​តិចតួច ​ហើយក៏គ្រោងបញ្ចប់ការលុបបាត់​អ្នកជំងឺ​គ្រុនចាញ់​ឆាប់ៗ​នេះដែរ។

ពលរដ្ឋរស់នៅស្រុកវឺនសៃ ខេត្តរតនគីរី បាន​បង្ហាញពីការយល់ដឹង​ពី​វិធីការពារខ្លួន​កុំឱ្យឆ្លងជំងឺ​គ្រុនចាញ់ ដូចជា ​ស្លៀក​សំលៀកបំពាក់​ខោ​អាវ​វែងៗ ​សម្រាន្ត​ក្នុងមុង និងពេល​សង្ស័យ​ទៅ​រក​អ្នកស្ម័គ្រចិត្ត​ព្យាបាលជំងឺគ្រុនចាញ់ជាដើម។

របាយការណ៍របស់មជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ​ប៉ារ៉ាស៊ីតសាស្រ្ត ​និងបាណកសាស្រ្ត ដែលបានចេញផ្សាយ​កាលពីពេលថ្មីៗនេះ​ បានបង្ហាញថា នៅឆ្នាំ២០២១ ​នៅប្រទេសកម្ពុជា មាន​ករណី​កើតជំងឺគ្រុនចាញ់ ​ចំនួនជាង ៤០០០ករណី​ ថយចុះ៥៤ភាគរយ បើប្រៀបធៀប​នឹង​ឆ្នាំ២០២០។ ​ករណីស្លាប់ដោយសារជំងឺគ្រុនចាញ់ ​គឺសូន្យ ​ចាប់តាំងពីឆ្នាំ២០១៨ ​មកដល់ឆ្នាំ២០២១ មានន័យថា ​សម្រេច​បាន​ជោគជ័យ​នូវ​សូចនាករ​អត្រាស្លាប់ ​បីឆ្នាំមុនគោលដៅឆ្នាំ២០២០៕ អត្តបទ៖ ទូច សោភ័ណ