ហែលទឹក៖ លោក ហែម គីរី អគ្គលេខាធិការសហព័ន្ធខ្មែរកីឡាហែលទឹកបានឲ្យដឹងថា សហព័ន្ធកំពុងពិភាក្សាគ្នាអំពីគម្រោងអញ្ជើញគ្រូបង្វឹកសិង្ហបុរីមកជួយបង្ហាត់ និងពង្រឹងបច្ចេកទេសកីឡាបាល់ទឹក ដើម្បីសម្រួចសមត្ថភាពត្រៀមស៊ីហ្គេមឆ្នាំ២០២៣ នៅកម្ពុជា។
លោកថា ដោយសារវិញ្ញាសាបាល់ទឹកគឺថ្មីសម្រាប់កម្ពុជា ទាមទារឲ្យមានការបណ្ដុះបណ្ដាលធនធានកីឡាករ-កីឡាការិនីដោយយកចិត្តទុកដាក់បំផុត ដើម្បីជំរុញគុណផលកម្រិតខ្ពស់ត្រៀមការប្រកួតប្រជែងក្នុងព្រឹត្តិការណ៍អន្ដរជាតិនានា ពិសេសក្នុងឋានៈជាម្ចាស់ផ្ទះស៊ីហ្គេមឆ្នាំ២០២៣។ អគ្គលេខាធិការសហព័ន្ធដដែលពន្យល់ថា ដំបូងឡើយ សហព័ន្ធមានគម្រោងបញ្ជូនកីឡាករ-កីឡាការិនីបាល់ទឹកកម្ពុជាទៅហ្វឹកហាត់នៅសិង្ហបុរី ប៉ុន្តែដោយសារវិញ្ញាសានេះ មានកីឡាករ-កីឡាការិនីតិចតួចនៅឡើយ ដូច្នេះឯកឧត្តមទេសរដ្ឋមន្ត្រី ស៊ុន ចាន់ថុល ប្រធានសហព័ន្ធខ្មែរកីឡាហែលទឹកបានបង្ហាញចក្ខុវិស័យវែងឆ្ងាយ ដោយគ្រោងនឹងអញ្ជើញគ្រូបង្វឹកពីសិង្ហបុរីមកជួយបង្ហាត់បច្ចេកទេសនៅកម្ពុជាវិញ។ លោកបន្ថែមថា ការនាំចូលគ្រូបង្វឹកមកជួយបង្ហាត់ក្នុងស្រុកមានភាពចំណេញច្រើនជាង ក្នុងការកសាងធនធានអត្តពលិកខ្មែរឲ្យកាន់តែសម្បូរបែប ហើយចំណាយតិចជាង។ ប្រសិនបើអត្តពលិកបាល់ទឹកទទួលបានកូតាត្រឹម ១០នាក់នោះយើងនឹងបញ្ជូនទៅហាត់នៅសិង្ហបុរីត្រឹម ១០នាក់ប៉ុណ្ណោះ ប៉ុន្តែបើអញ្ជើញគ្រូមកជួយបង្ហាត់នៅកម្ពុជាវិញគឺអាចផលិតធនធានអត្តពលិកវាបច្រើនជាង សម្រាប់គោលដៅត្រៀមស៊ីហ្គេម ២០២៣ និងត្រៀមការប្រកួតអន្តរជាតិនានា។
ទន្ទឹមជាមួយផែនការពង្រឹងការហ្វឹកហាត់សមត្ថភាព និងបច្ចេកទេសដល់កីឡាករ-កីឡាការិនីនេះ សហព័ន្ធក៏បានស្នើសុំដល់សហព័ន្ធកីឡាហែលទឹកសិង្ហបុរី ដើម្បីជួយសម្របសម្រួលក្នុងការចូលរួមការប្រកួតនានានៅប្រទេសសិង្ហបុរី ដើម្បីវាស់ស្ទង់សមត្ថភាព មុនពេលទទួលធ្វើម្ចាស់ផ្ទះការប្រកួតកីឡាស៊ីហ្គេមលើកទី៣២ ឆ្នាំ២០២៣ ផងដែរ។ នេះជាជំហានថ្មីមួយទៀត ក្រោមការជំរុញ និងខិតខំប្រឹងប្រែងរបស់ថ្នាក់ដឹកនាំសហព័ន្ធ ក្នុងការបណ្តុះបណ្តាលធនធានអត្តពលិកបាល់ទឹក ដើម្បីសម្រួចគោលដៅដ៏ធំចម្បងនៃការទទួលធ្វើម្ចាស់ផ្ទះព្រឹត្តិការណ៍ស៊ីហ្គេម ក្រៅវិញ្ញាសាហែលទឹកដែលសហព័ន្ធគ្រោងនឹងបញ្ជូនទៅហ្វឹកហាត់នៅចិន តាមរយៈគណៈកម្មាធិការជាតិ CAMSOC។ នេះបើតាមការបញ្ជាក់បន្ថែមរបស់លោក ហែម គិរី៕
អត្ថបទ លី ឈុនឡា, រូបភាពពាក់ព័ន្ធ ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
