ភ្នំពេញ៖ ក្រសួងការងារ និងបណ្តុះបណ្តាលវិជ្ជាជីវៈ បានជូនដំណឹងដល់រោងចក្រ សហគ្រាស ត្រូវរៀបចំចាក់វ៉ាក់សាំងដូសជំរុញ ជូនដល់កម្មករនិយោជិត ស្របតាមអនុសាសន៍របស់ប្រមុខរាជរដ្ឋាភិបាលកម្ពុជា ក្នុងការចូលរួមប្រយុទ្ធប្រឆាំង និងទប់ស្កាត់ការរីករាលដាល នៃវីរុសបំប្លែងខ្លួនថ្មីប្រភេទ អូមីក្រុង ទៅលើកម្មករនិយោជិត។

យោងតាមសេចក្តីជូនដំណឹងរបស់ក្រសួងការងារ និងបណ្ដុះបណ្ដាលវិជ្ជាជីវៈ នៅថ្ងៃទី២០ ខែមេសា ឆ្នាំ២០២២នេះ បានបញ្ជាក់ថា ដើម្បីបន្តប្រយុទ្ធ និងទប់ស្កាត់ការឆ្លងរាលដាលជំងឺកូវីដ១៩ ដែលបំប្លែងខ្លួនថ្មី អូមីក្រុង ជាពិសេសនៅតាមរោងចក្រ សហគ្រាស ក្រសួងការងារសូមក្រើនរំលឹក​ដល់ម្ចាស់ ឬនាយករោងចក្រ សហគ្រាសទាំងអស់ ត្រូវសហការជាបន្ទាន់ ជាមួយអាជ្ញាធរមូលដ្ឋាន រាជធានីខេត្ត និងមន្ទីរការងារ ​និងបណ្តុះបណ្តាលវិជ្ជាជីវៈរាជធានី ខេត្តដើម្បីរៀបចំចាក់វ៉ាក់សាំង​ដូសជំរុញ ទាំងដូសទី៣ និងដូសទី៤ ជូនកម្មករ និយោជិតនៅតាមរោងចក្រ សហគ្រាស។

ក្រសួងការងារ បានបញ្ជាក់ទៀតថា ម្ចាស់ ឬនាយករោងចក្រ សហគ្រាស ត្រូវគ្រប់គ្រងទិន្នន័យ ចាក់វ៉ាក់សាំង របស់កម្មករ និយោជិត និងបំពេញព័ត៌មានចាក់វ៉ាក់សាំង ​ទៅក្នុងរបបស្វ័យប្រកាស អធិការកិច្ចការងារ ​តាមប្រព័ន្ធស្វ័យប្រវត្តិកម្ម ។​

ក្នុងករណីកម្មករ និយោជិត​ មិនទាន់មានប័ណ្ណចាក់វ៉ាក់សាំង កូវីដ-១៩​ សូមបំពេញឈ្មោះ និងកាល​បរិច្ឆេទចាក់វ៉ាក់សាំង តាមទម្រង់ដែលបានកំណត់ក្នុងប្រព័ន្ធ។

សូមបញ្ជាក់ ​កាលពីថ្ងៃម្សិលមិញនេះ ​ក្នុង​ពិធី​សម្ពោធ​សមិទ្ធផល​នានា ដែលជាគម្រោង​ការពារ​ទឹកជំនន់ ​និងកែលម្អប្រព័ន្ធប្រឡាយ-លូ​ ក្នុងរាជធានីភ្នំពេញជំហានទី៤ ​សម្តេចតេជោ ហ៊ុន សែន នាយករដ្ឋ​មន្រ្តី​នៃកម្ពុជា​ បានអំពាវនាវដល់ប្រជាពលរដ្ឋទៅទទួលវ៉ាក់សាំង​បង្ហារកូវីដ-១៩ ដូស​ជំរុញទី៣ និងដូសទី៤ ដើម្បីពង្រឹងភាពស៊ាំសហគមន៍ប្រឆាំង​នឹងការឆ្លងរីករាលដាលកូវីដ-១៩កាន់តែខ្លាំង​នៅតាមរោងចក្រ អាជីវករ ​និងអ្នកប្រកបរបរសេដ្ឋកិច្ច​ក្រៅប្រព័ន្ធជាដើម ក្នុងនោះ​ប្រសិន​បើការ​ចាក់រាយប៉ាយ​ ពីដើមទី​ គឺយើងអត់មានភាពស៊ាំសហគមន៍កើតឡើងបានឡើយ៕អត្ថបទ៖ ឈិត បូរ៉ាវី