ភ្នំពេញ៖ នាយឧត្តមសេនីយ៍ កែវ វណ្ណថន អ្នកនាំពាក្យអគ្គនាយកដ្ឋានអន្តោប្រវេសន៍ បានឲ្យដឹងថា រយៈពេលប្រមាណ១ខែ ក្រោយពីរាជរដ្ឋាភិបាលកម្ពុជា បានលើកលែងធ្វើតេស្តមុន ៧២ម៉ោង និងការធ្វើតេស្តរហ័ស មានជនបរទេសឆ្លងដែនចូលកម្ពុជាជាង ៨ម៉ឺននាក់។

ថ្លែងប្រាប់ BTV News នៅថ្ងៃទី២១ ខែមេសា ឆ្នាំ២០២២ នាយឧត្តមសេនីយ៍ កែវ វណ្ណថន អគ្គនាយករង និងជាអ្នកនាំពាក្យអគ្គនាយកដ្ឋានអន្តោប្រវេសន៍ បានឲ្យដឹងថា បន្ទាប់ពី​រាជរដ្ឋាភិបាល​បានសម្រេចលើកលែងការធ្វើតេស្តមុន៧២ម៉ោង និងការធ្វើតេស្តរហ័ស ទៅលើ​ជនបរទេសឆ្លងដែនចូលកម្ពុជាមក ​រយៈពេលប្រមាណ១ខែកន្លងមក មាន​លំហូរ​ជនបរទេស​បាន​ធ្វើដំណើរចូលកម្ពុជាជាង ៨ ម៉ឺននាក់ដែលចំនួននេះ ​មានការកើនឡើង ​ទាំងតាមច្រកទ្វារព្រំដែន​ផ្លូវអាកាស ​និងផ្លូវគោក ។

នាយឧត្តមសេនីយ៍ បន្តថា ក្នុងចំណោមមធ្យោបាយធ្វើដំណើរឆ្លងដែនរវាងព្រំដែនគោក និង​ព្រំដែន​ផ្លូវអាកាស គឺជនបរទេសភាគច្រើនឆ្លងដែនតាមផ្លូវអាកាស។

នាយឧត្តមសេនីយ៍ កែវ វណ្ណថន បានឲ្យដឹងទៀតថា រយៈពេលមួយខែកន្លងទៅ មន្រ្តីអន្តោប្រវេសន៍​តាម​ច្រកទ្វារព្រំដែនអន្តរជាតិ បានហាមមិនឲ្យជនបរទេសចំនួនជាង ៧០នាក់ចូលកម្ពុជា បន្ទាប់​ពីរកឃើញថា ជបរទេសទាំងនោះភាគច្រើនមិនមានគោលដៅច្បាស់លាស់ និងខ្លះទៀត​មិន​ស្រប​ទៅតាមច្បាប់ស្តីពីអន្តោប្រវេសន៍។

ទាក់នឹងការ​បន្ធូរបន្ថយ​វិធានការសម្រាប់អ្នកដំណើរចូលមកកម្ពុជានេះ ​នៅថ្ងៃទី ២១ ខែមេសា ឆ្នាំ ២០២២ ​នេះផងដែរ ក្រសួងសុខាភិបាល ​ក៏បានសម្រេច​កែសម្រួល​លើអ្នកធ្វើដំណើរមក​ពី​បរទេសបន្ថែមទៀត ​ដោយកាត់បន្ថយការធ្វើ​ចត្តាឡីស័ក​ ចំពោះអ្នក​ដំណើរមកពីបរទេស ដែល​មិនបាន​ចាក់វ៉ាក់សាំងកូវីដ-១៩​ ពីរយៈពេល១៤ថ្ងៃ ​មកត្រឹមរយៈពេល ​៧ថ្ងៃវិញ។ជុំវិញការសម្រេចថ្មីនេះ នាយឧត្តមសេនីយ៍ កែវ វណ្ណថន ក៏បានណែនាំដល់មន្រ្តីអន្តោប្រវេសន៍​តាម​បណ្តាច្រកទ្វារព្រំដែនទាំងអស់ត្រូវអនុវត្ត​ឲ្យបានត្រឹមត្រូវ ដើម្បីរួមចំណែកជំរុញឲ្យជនបរទេស​ឆ្លងដែន​ចូលកម្ពុជា​កាន់តែច្រើ​ន ទាំងអ្នកវិនិយោគ ​និងទេសចរណ៍ជាដើម​៕ អត្ថបទ៖ សេក ឧត្តម