ភ្នំពេញ៖ បើតាមបណ្តាអ្នកលក់ឱសថ អះអាងថា ក្រោយពិធីបុណ្យចូលឆ្នាំថ្មីនេះ ការលក់ឱសថព្យាបាលកូវីដ១៩ និងឧបរករណ៍តេស្តរហ័ស កំពុងធ្លាក់ចុះខ្លាំង ខណៈដែលករណីឆ្លងថ្មីក៏មានការថយចុះ បង្ហាញពីសញ្ញាណល្អនៃការថយចុះជំងឺកូវីដ១៩។

បើតាមម្ចាស់ឱសថស្ថានស្រីមុំផ្សារតាប៉ាង និងតំណាងឱសថស្ថានសុវណ្ណភូមិ នៅជិតផ្សារធំថ្មី បានថ្លែងប្រាប់BTV ដូចៗគ្នាថា នៅក្រោយថ្ងៃបុណ្យចូលឆ្នាំថ្មីនេះ ពលរដ្ឋដែលអញ្ជើញមកទិញ​ឱសថ​នានា​ដែលពាក់ព័ន្ធនឹងការព្យាបាលជំងឺកូវីដ១៩ ជាពិសេសឱសថMolnupiravir និងឧបរករណ៍តេស្តរហ័សជាដើមនោះ ​គឺមានស្ទើរមិនដល់១០%នោះទេ ប្រៀបធៀប និងថ្ងៃបុណ្យ​ចូលឆ្នាំប្រពៃណីចិន កាលពីអំឡុងចុងខែមករា ឆ្នាំ២០២២នេះ ។

បើតាមលោកជំទាវ ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល ថ្លែងថា បច្ចុប្បន្ននេះ ក្រសួងសុខាភិបាលបានអនុញ្ញាត​អោយមានការនាំចូល​ឱសថព្យាបាលកូវីដ១៩​ ជាពិសេសឱសថMolnupiravir និងឧបរករណ៍តេស្តរហ័សច្រើន​មកក្នុងប្រទេសកម្ពុជា​ ដើម្បី​ជម្រុញអោយតម្លៃលក់មានការធ្លាក់ថ្លៃ តែចំនួនការទិញឱសថព្យាបាលកូវីដ និងការទិញ​ឧបករណ៍​ធ្វើ​តេស្តរហ័សរបស់ប្រជាពលរដ្ឋមានចំនួនតិច ​ឬច្រើន ​គឺវាអាស្រ័យលើការឆ្លងកើតជំងឺកូវីដ១៩ ហើយពលរដ្ឋ​មានយល់ដឹង មានការប្រុងប្រយ័ត្នរៀងៗខ្លួនខ្លាំង ជាពិសេសគឺការទទួលបានការចាក់​វ៉ាក់សាំង​កូវីដ១៩ ដូសមូលដ្ឋាន​ និងដូស​ជម្រុញ​បានត្រឹមត្រូវ​ ទៅតាមការណែនាំរបស់គ្រូពេទ្យ។

ទោះយ៉ាងណាក៏ដោយ លោកជំទាវ ឱ វណ្ណឌីន ​ក៏បានណែនាំដែរថា គ្រប់ពលរដ្ឋទាំងអស់បើមាន​សង្ស័យថា​ខ្លួនមានអាការៈសុខភាពមិនស្រួល គឺអាចទិញឧបករណ៍តេស្តរហ័សនេះទៅធ្វើតេស្ត​ដោយ​ខ្លួនឯងបាន ដើម្បីដឹងនិងព្យាបាលជំងឺកូវីដ១៩នោះទាន់​ពេលវេលា ។ ដោយឡែក​សម្រាប់​ការ​ទិញឱសថMolnupiravirវិញ ​គឺយើងបានហាមទិញយកទៅ​លេប​ការពារកូវីដ១៩ ពោល​គឺត្រូវទិញ​នៅពេលដែលយើងធ្វើតេស្តឃើញវិជ្ជមានកូវីដ១៩ប៉ុណ្ណោះ៕ អត្ថបទ ស៊ុម សុខជា