រដ្ឋាករទឹកស្វយ័តក្រុងភ្នំពេញ នៅក្នុងឆ្នាំ២០២៦នេះ គ្រោងប្រមូលចំណូលឲ្យបានក្នុងរង្វង់ជិត ៤០០ ប៊ីលានរៀល ខណៈការផ្គត់ ផ្គង់ទឹកស្អាតក្នុងឆ្នាំនេះមានកំណើនកើនឡើង ស្រប​ពេល​ការ​ត​បណ្តាញ​ចូល​ខ្នងផ្ទះ ត្រូវបានគ្រោងក្នុងរង្វង់ប្រមាណជាង ៣០ពាន់ខ្នង ផ្ទះផងដែរ។

លោក ដេង ប៉ូលីដែន អគ្គនាយករងទទួលបន្ទុកហិរញ្ញកិច្ចនៃរដ្ឋាករទឹកស្វយ័តក្រុងភ្នំពេញ លើក​ឡើង​ក្នុង​បទ​បង្ហាញនៅក្នុងមហាសន្និបាតភាគហ៊ុនិកលើកទី១៤ របស់​រដ្ឋាករទឹក​ស្វយ័ត​ក្រុង​ភ្នំពេញ​ នៅចុងសប្តាហ៍កន្លងមកថា សម្រាប់ផែនការផលិតកម្មរបស់ រដ្ឋាករទឹក​ស្វយ័ត​ក្រុង​ភ្នំពេញ​ក្នុង​ឆ្នាំ​២០២៦នេះ នៅក្នុងកិច្ចដំណើររោងចក្រប្រព្រឹត្តិកម្មទឹកស្អាតចំនួន ៩ កន្លែង គ្រោង​ផលិត​ទឹក​ស្អាតសរុបបានចំនួនជិត ៣២៩ លានម៉ែត្រគូបក្នុងមួយឆ្នាំ ក្នុងផែន​ការ​ផលិត​កម្ម​ជា​មធ្យម​ប្រចាំ​ថ្ងៃជាង ៩០ម៉ឺនម៉ែត្រគូបក្នុងមួយថ្ងៃ ក្នុងនោះការតបណ្តាញចូលខ្នងផ្ទះ ត្រូវ​បាន​គ្រោង​ប្រមាណ ៣០ពាន់ខ្នងផ្ទះបន្ថែមផងដែរ។

 ដោយឡែកផែនការប្រមូលចំណូលវិញ សម្រាប់ឆ្នាំ២០២៦នេះ រដ្ឋាករទឹក​ស្វយ័ត​ក្រុង​ភ្នំពេញ​គ្រោង​ប្រមូល​ចំណូលក្នុងរង្វង់ សរុបជិត ៤០០ ប៊ីលានរៀល ដោយក្នុងនោះចំណូលលើថ្លៃទឹក គ្រោង​ជាង ៣៥៣ ប៊ីលានរៀល, ចំណូលសិទ្ធិជាវទឹកជាង ១១ ប៊ីលានរៀល, ចំណូល​ពី​សេវា​កម្ម​ជាង ​៧ ​ប៊ីលានរៀល, ចំណូលលើអត្រាប្តូរប្រាក់ជាង ៣ ប៊ីលានរៀល និងចំណូលផ្សេងៗជាង ២៥ ​ប៊ីលានរៀល (ចំណូលមិនទាន់ទូទាត់ចំណាយ)។

សូមបញ្ជាក់ថា ផែនការផលិតទឹកស្អាតរបស់រដ្ឋាករទឹកស្វយ័តក្រុងភ្នំពេញ នៅក្នុងឆ្នាំ២០២៦នេះ ក្នុង​នោះ​រោងចក្រប្រព្រឹត្តកម្មទឹក ស្អាតភូមិព្រែក គ្រោងក្នុងផែនការប្រមាណជាង ៥២ លាន​ម៉ែត្រ​គូប​ក្នុង​មួយ​ឆ្នាំ, រោងចក្រជ្រោយចង្វា ជិត ៤៥ លានម៉ែត្រគូប, រោងចក្រចំការមនជាង ១៨ លាន​ម៉ែត្រ​គូប, រោងចក្រនិរោធ ជាង ៩៣ លានម៉ែត្រគូប, បាក់ខែងជំហានទី១និងទី២ ជាង ១១០ លានម៉ែត្រគូប, បឹងធំ ជាង ១.៥ លានម៉ែត្រគូប, តាខ្មៅ ជាង ៦.៧ លានម៉ែត្រគូប, ម្លេច ជាង​ ៤៥ លានម៉ែត្រគូប និងរោងចក្រត្បូង ឃ្មុំ ជាង ៥៨ លានម៉ែត្រគូបក្នុងមួយឆ្នាំ៕ អត្ថបទ៖ សុន រ៉ាឌី