​បាល់ទាត់៖ ​អ្នកចាត់ការ​ក្រុម​ជំរើសជាតិ​អង់គ្លេស ​លោក Gareth Southgate បាន​បញ្ចេញ​បញ្ជី​ឈ្មោះ​កីឡាករ​ទាំង ២៦នាក់របស់ខ្លួន​ផ្លូវការ​ថ្ងៃ​ព្រហស្បតិ៍​ម្សិលមិញ​ មុន​ការប្រកួត​ជំ​រុះ World Cup​។ ​​ខ្សែការពារ​សំខាន់​ម្នាក់​បាន​បាត់ឈ្មោះ​គឺ​ខ្សែការពារ Liverpool, Trent Alexander-Arnold ដោយ​លោក Southgate ថា​ ទំរង់​របស់ Arnold ធ្លាក់ចុះ​មួយរយៈ​ចុងក្រោយ​។

​​ជាមួយគ្នា​នោះដែរ​ខ្សែការពារ Manchester City, John Stones ត្រូវបាន​កោះហៅ​ចូល​ក្រុម​ជំរើសជាតិ​វិញ ​ក្រោយពី​ខកខាន​តាំងពី​ខែវិច្ឆិកា​ ឆ្នាំ២០១៩​។ ​​Stones បានរួម​ចំណែក​សំខាន់​ក្នុងការ​កាន់កាប់​កំពូល​តារាង English Premier League ដាច់ ១៤ពិន្ទុ​ពី Manchester United​។ ​​ចំណែកឯ​ខ្សែការពារ Manchester United, Luke Shaw ក៏ត្រូវ​បាន​កោះហៅ​ត្រលប់​មកវិញ​ដែរ បន្ទាប់ពី​បង្ហាញខ្លួន​ឲ្យ​ក្រុម​ជំរើសជាតិ​ទើបតែ​បាន ៨លើក​បន្ទាប់មក​ខកខាន​ជិត​ពីរ​ឆ្នាំ​។ ​​Jesse Lingard ខ្សែបំរើ​ប្រយុទ្ធ​ដែល West Ham ខ្ចី​ពី Manchester United ក៏ត្រូវ​បាន​កោះហៅ​ដែរ​ បន្ទាប់ពី​ខកខាន​តាំងពី​ខែមិថុនា​ ឆ្នាំ២០១៩​។

ដោយឡែក​កីឡាករ​វ័យ ១៧ឆ្នាំ Jude Bellingham ដែល​កំពុង​លេង​ឲ្យ Dortmund តាមពិតទៅ​សម​នឹង​ទទួលបាន​កៅអី​មួយ ​ជាមួយ​ក្រុម​ជំរើសជាតិ​អង់គ្លេស​ដែរ ក៏ប៉ុន្តែ​ដោយសារតែ Covid-19 ពិបាក​ក្នុងការ​ធ្វើដំណើរ​ចេញពី​ទឹកដី​អាល្លឺម៉ង់​។ ​កីឡាករ​ដែល​ត្រូវបាន​កោះ​ហៅចូល​ក្រុម​ជំរើសជាតិ​អង់គ្លេស ​ជា​លើកដំបូង​មាន​ខ្សែប្រយុទ្ធ Aston Villa, Ollie Watkins និង Sam Johnstone៕

​អត្ថបទ​៖​នាង សុភា​វុ​ធ