មន្ត្រីជាន់ខ្ពស់អ៊ីរ៉ង់មួយរូព កាលពីថ្ងៃអាទិត្យ (ទី៣១ ខែឧសភា ឆ្នាំ២០២៦) បានបដិសេធរបាយការណ៍ ដែលអះអាងថា ប្រធានាធិបតី លោក​ Masoud Pezeshkian បានលាលែងពីតំណែង។

តាម​រយៈ​ការបង្ហោះមួយនៅលើបណ្ដាញ​សង្គម X អនុប្រធានផ្នែកទំនាក់ទំនងរបស់ការិយាល័យប្រធានាធិបតី លោក Mehdi Tabatabaei បានច្រានចោលរបាយការណ៍ អំពីការលាលែងពីតំណែងរបស់លោក Pezeshkian ដោយ​បញ្ជាក់​ថា គឺ​ព័ត៌មាន​ «មិនពិត» និង​ចាត់​ទុក​ថា ជាការបន្ត «ល្បែងបណ្ដាញ​សារព័ត៌មាន​» របស់ស្ថាប័នបរទេសមួយចំនួន។

លោក Tabatabaei បាននិយាយថា «លោក Pezeshkian នឹងមិនដកខ្លួន​ពីការបម្រើប្រជាជនអ៊ីរ៉ង់នោះឡើយ​» ដោយសង្កត់ធ្ងន់ថា ប្រទេស​អ៊ីរ៉ង់ «នឹងមិនដកថយចេញ​មាគ៌ាឯកភាព និងសាមគ្គីភាព​ជាដាច់ខាត​»។ លោក បានបន្ថែមថា អ្នកដែលស្វែងរកការបំផ្លាញឯកភាពជាតិរបស់អ៊ីរ៉ង់ នឹង «គ្មាន​ថ្ងៃសម្រេច​​ដូច​បំណង» ជា​ថ្មី​ម្តងទៀតឡើយ​ ដោយបដិសេធពាក្យ​ចចាម​អារ៉ាម​ អំពីការបែកបាក់ នៅក្នុងប្រទេស។

គួរ​បញ្ជាក់​ថា សហរដ្ឋអាមេរិក និងអ៊ីស្រាអែលបានបើកការវាយប្រហារ លើ​អ៊ីរ៉ង់ កាល​ពី​ចុងខែកុម្ភៈ។ ទីក្រុងតេអេរ៉ង់បានសងសឹកដោយការវាយប្រហារដែលកំណត់គោលដៅអ៊ីស្រាអែល និងសម្ព័ន្ធមិត្តអាមេរិក នៅឈូងសមុទ្រពែក្ស ខណៈពេលដែលបិទច្រកសមុទ្រ Hormuz។ បទឈប់បាញ់មួយ​ បានចូលជាធរមាននៅថ្ងៃទី៨ ខែមេសា តាមរយៈការសម្របសម្រួលរបស់ប៉ាគីស្ថាន ប៉ុន្តែការចរចាជាបន្តបន្ទាប់នៅទីក្រុងអ៊ីស្លាម៉ាបាដ មិន​អាច​​បង្កើតបាន​កិច្ចព្រមព្រៀងយូរអង្វែងមួយ​ឡើយ​៕