លោក Tedros Adhanom Ghebreyesus អគ្គនាយកអង្គការសុខភាពពិភពលោក (WHO) បានអំពាវនាវឱ្យមានទំនុកចិត្តកាន់តែខ្លាំងនៅក្នុងសហគមន៍ និងសាមគ្គីភាពអន្តរជាតិ ក្នុងការឆ្លើយតបទៅនឹងការផ្ទុះឡើងជំងឺអេបូឡានៅក្នុងសាធារណរដ្ឋប្រជាធិបតេយ្យកុងហ្គោ (DRC) ដោយព្រមានថា បម្រាមធ្វើដំណើរ និងការបិទព្រំដែន អាចធ្វើឱ្យការប្រយុទ្ធប្រឆាំងជំងឺនេះ កាន់តែពិបាក។

ថ្លែងនៅក្នុងសន្និសីទសារព័ត៌មានរួមជាមួយមន្ត្រីប្រទេសកុងហ្គោនៅក្រុង Bunia ទីរួមខេត្ត Ituri ភាគឦសាន និងជាចំណុចកណ្តាលនៃការផ្ទុះឡើងជំងឺនេះ លោក Tedros បាននិយាយថា លោកបានទៅកាន់តំបន់នោះ ដើម្បីបង្ហាញថា ប្រជាជននៅក្នុងខេត្ត Ituri ខេត្តNorth Kivu និងខេត្តSouth Kivu និងនៅទូទាំងសាធារណរដ្ឋប្រជាធិបតេយ្យកុងហ្គោ «មិនឯកានោះទេ»។

លោក Tedros និយាយថា «យើងមិននៅទីនេះ ដើម្បីប្រាប់មនុស្សពីអ្វីដែលត្រូវធ្វើទេ។ យើងនៅទីនេះដើម្បីស្តាប់» ដោយសង្កត់ធ្ងន់ថា សហគមន៍យល់ពីបញ្ហាប្រឈមរបស់ពួកគេ ហើយជារឿយៗស្ថិតក្នុងទីតាំងដ៏ល្អបំផុតដើម្បីកំណត់ដំណោះស្រាយ។ ការកសាងទំនុកចិត្តត្រូវការពេលវេលា ហើយវាចាប់ផ្តើមដោយការស្តាប់។ ក្នុងរយៈពេលពីរសប្តាហ៍កន្លងទៅនេះ មានករណីសង្ស័យជាង ១.០០០ ករណី និងករណីអ្នកស្លាប់ដែលសង្ស័យមានជាង ២៣០ករណី ត្រូវបានរាយការណ៍។ ប្រទេសជិតខាងអ៊ូហ្គង់ដា ក៏បានរាយការណ៍ពីករណីដែលបានបញ្ជាក់មានចំនួន៩ករណី ផងដែរ។ ប្រមុខអង្គការសុខភាពពិភពលោក និយាយថា ការចូលរួមរបស់សហគមន៍ អ្នកដឹកនាំរបស់រដ្ឋាភិបាល និងការគាំទ្រពីអន្តរជាតិ នឹងក្លាយជាគន្លឹះក្នុងការបញ្ចប់ការផ្ទុះឡើងជំងឺនេះ ដែលបានរាលដាលនៅទូទាំងខេត្តភាគខាងកើតចំនួនបី នៅក្នុងតំបន់មួយដែលកំពុងតែតានតឹងរួចទៅហើយដោយសារអសន្តិសុខ ចលនាប្រជាជន និងតម្រូវការមនុស្សធម៌។