កតិកាសញ្ញាការពារជាតិរបស់សម្ព័ន្ធ​ AUKUS បានទទួលសន្ទុះដ៏សំខាន់ នៅឯកិច្ចសន្ទនា Shangri-La ដែលជាវេទិកាការពារជាតិ និងសន្តិសុខប្រចាំឆ្នាំ។

សមាជិករបស់​សម្ព័ន្ធ​ AUKUS គឺអូស្ត្រាលី ចក្រភពអង់គ្លេស និងសហរដ្ឋអាមេរិក បានបង្ហាញពីការប្រឹងប្រែង ដើម្បីបង្កើនសមត្ថភាពរួមគ្នារបស់ពួកគេ ក្នុងការប្រមូលព័ត៌មានស៊ើបការណ៍សម្ងាត់ ក្រោមសមុទ្រ និងការពារហេដ្ឋារចនាសម្ព័ន្ធ ក្រោមសមុទ្រសំខាន់ៗ ដូចជាខ្សែកាប និងបំពង់បង្ហូរប្រេងជាដើម។

កតិកាសញ្ញាការពារជាតិ ដែលត្រូវបានបង្កើតឡើងក្នុងឆ្នាំ២០២១ ដើម្បីទប់ទល់នឹងឥទ្ធិពលកាន់តែខ្លាំងឡើងៗរបស់ចិន នៅក្នុង​តំបន់ឥណ្ឌូ-ប៉ាស៊ីហ្វិក មានសសរស្តម្ភចំនួន ២។

ក្រោមសសរស្តម្ភទី១ ចក្រភពអង់គ្លេស និងសហរដ្ឋអាមេរិក នឹងគាំទ្រការទិញនាវាមុជទឹកដើរដោយថាមពលនុយក្លេអ៊ែររបស់ប្រទេសអូស្ត្រាលី ខណៈដែលសសរស្តម្ភទី២ មានគោលបំណងបង្កើនកិច្ចសហប្រតិបត្តិការ ក្នុងសមត្ថភាពការពារជាតិកម្រិតខ្ពស់រួមបញ្ចូលគ្នា។ តែ​យ៉ាងណាក្ដី​ មានក្ដី​បារម្ភថ្មីៗនេះថា កតិកាសញ្ញានេះស្ថិតនៅក្រោមការគំរាមកំហែង ដោយសារតែវឌ្ឍនភាពយឺតយ៉ាវ​របស់វា ជាពិសេស ពាក់​ព័ន្ធ​នឹង​សសរស្តម្ភទី២។

នាយ​សេនាធិការការពារជាតិរបស់​ចក្រភពអង់គ្លេស និងជា​​មេបញ្ជាការកងទ័ពអាកាស លោក​ Richard Knighton បានប្រាប់សារព័ត៌មាន​ Straits Times ក្នុងបទសម្ភាសន៍មួយថា គម្រោងចុះហត្ថលេខាដំបូងក្រោមសសរស្តម្ភទី២ នឹងឃើញការដាក់ពង្រាយយានដ្រូន​ក្រោម​សមុទ្រទំហំធំ (XLUUVs)។ យានទាំង​នោះ​ត្រូវបានគេរំពឹងថា នឹងត្រូវបានដាក់ពង្រាយចាប់ពីឆ្នាំ២០២៧។

សសរស្តម្ភទី២ មានគោលបំណងបង្កើនសមត្ថភាពរបស់ប្រទេសទាំង៣ និងដៃគូរបស់ពួកគេ នៅក្នុងវិស័យជាច្រើន រាប់​ចាប់ពីមីស៊ីលល្បឿនលឿនជាងសំឡេង រហូតដល់បច្ចេកវិទ្យាកង់ទិច និងបញ្ញាសិប្បនិម្មិត (AI)។ តែ​ទោះជា​យ៉ាងណានេះ​ក្ដី តំបន់ងាយរងគ្រោះផ្នែកសន្តិសុខភ្លាមៗដែលត្រូវបានគូសបញ្ជាក់ដោយមន្ត្រីការពារជាតិ នៅឯកិច្ចសន្ទនា Shangri-La គឺជាវិស័យដែលទាក់ទងនឹងហេដ្ឋារចនាសម្ព័ន្ធក្រោមសមុទ្រ​៕