នៅ​ថ្ងៃចន្ទ (ទី១ ខែមិថុនា ឆ្នាំ២០២៦) នេះ​ ប្រទេស​អ៊ីរ៉ង់បានបន្ទោស​ការ​ធ្វើ​ឲ្យ​យឺត​ដល់​ល្បឿន​នៃ​កិច្ចប្រឹងប្រែង ដើម្បីបញ្ចប់ជម្លោះ រវាងសហរដ្ឋអាមេរិក និងអ៊ីរ៉ង់ ដោយ​លោក​បញ្ជាក់​ថា គឺ​ដោយសារ​កង្វះខាត​ទំនុកចិត្ត ជំហរផ្ទុយពីទីក្រុងវ៉ាស៊ីនតោន និងការវាយប្រហារជាបន្តបន្ទាប់របស់អ៊ីស្រាអែល នៅក្នុងតំបន់។

អម​ដោយ​ការ​​បន្ថែមថា ប្រទេសទាំង២ មិនទាន់ឈានដល់ការសន្និដ្ឋានចុងក្រោយនៅឡើយទេ អ្នកនាំពាក្យក្រសួងការបរទេស លោក Esmaeil Baghaei បាននិយាយ​ថា៖ «ការចរចាបានចាប់ផ្តើមក្នុងចំណោមការសង្ស័យ និងការមិនទុកចិត្តយ៉ាងខ្លាំង ហើយការផ្លាស់ប្តូរសារ កំពុងកើតឡើងនៅក្នុងបរិយាកាសនេះ»។

លោកបានប្រាប់​ទៀត​ថា៖ «ភាគីម្ខាងទៀតកំពុងផ្លាស់ប្តូរទស្សនៈរបស់ខ្លួនឥតឈប់ឈរ និងដាក់ចេញនូវការទាមទារថ្មី ឬផ្ទុយគ្នា។​ វាជារឿងធម្មតាដែលស្ថានភាពនេះនឹងធ្វើ​ឲ្យ​ការចរចាអូស​បន្លាយ​ពេល​»។

លោក Baghaei បានសង្កត់ធ្ងន់​ថា ប្រសិនបើសារផ្ទុយជាផ្នែកមួយនៃយុទ្ធសាស្ត្រចរចារបស់សហរដ្ឋអាមេរិក ពួកគេនឹងមិនធ្វើការជាមួយអ៊ីរ៉ង់ទេ ហើយ​ខណៈពេលដែលប្រសិនបើពួកគេឆ្លុះបញ្ចាំងពីភាពច្របូកច្របល់នៅក្នុងរង្វង់​រដ្ឋបាលសហរដ្ឋអាមេរិក ទីក្រុងវ៉ាស៊ីនតោនគួរតែឈានដល់ជំហរច្បាស់លាស់ និងដាច់​ណាត់​ឲ្យ​បានឆាប់តាមដែលអាចធ្វើទៅបាន។

ជាមួយគ្នា​នេះ លោក Baghaei បានបញ្ជាក់​ថា ទីក្រុងតេអេរ៉ង់ចាត់ទុកប្រតិបត្តិការ​របស់អ៊ីស្រាអែលនៅក្នុងតំបន់ រួមទាំងនៅប្រទេសលីបង់ផង​ដែរ​ ថា ជា​អ្វីដែល​មិនអាចផ្ដាច់​ចេញពវិធានការ​របស់​​សហរដ្ឋអាមេរិកបានឡើយ​ ដោយបន្ថែមថា កិច្ចព្រមព្រៀងណាមួយ ដើម្បីបញ្ចប់ជម្លោះក្នុងតំបន់ នឹងត្រូវរួមបញ្ចូលការអនុវត្តបទឈប់បាញ់ នៅលីបង់ដូច​គ្នាដែរ​៕