លោក​ប្រធានាធិបតី Donald Trump នៅ​ថ្ងៃចន្ទ (ទី១ ខែមិថុនា ឆ្នាំ២០២៦) នេះ​ បានបញ្ជាក់​ឲ្យ​ដឹង​ថា ប្រទេស​អ៊ីរ៉ង់ពិតជាចង់ធ្វើកិច្ចព្រមព្រៀងជាមួយសហរដ្ឋអាមេរិកមែន​ ហើយវានឹងក្លាយជាកិច្ចព្រមព្រៀងដ៏ល្អមួយ សម្រាប់ទីក្រុងវ៉ាស៊ីនតោន និងសម្ព័ន្ធមិត្តរបស់ខ្លួន។

សាររបស់លោកបានកើត​មាន​ឡើង​ត្រឹមតែប៉ុន្មានម៉ោងប៉ុណ្ណោះ បន្ទាប់ពីយោធាអាមេរិក បានប្រាប់​ថា ខ្លួនបានវាយប្រហារទីតាំងយោធាអ៊ីរ៉ង់ កាលពីចុងសប្តាហ៍ ហើយកងឆ្មាំបដិវត្តន៍អ៊ីរ៉ង់ បានឲ្យ​ដឹង​ថា ពួកគេបានកំណត់គោលដៅមូលដ្ឋានទ័ពអាមេរិកមួយ ជាការឆ្លើយតប ដែល​ជាហេតុការណ៍​​ចុងក្រោយបំផុត ក្នុងចំណោមការវាយ​ប្រហារ​គ្នា​ទៅវិញ​ទៅមកជា​បន្តបន្ទាប់ ក្នុង​អំឡុងពេលមាន​ការចរចា ដើម្បីបញ្ចប់សង្គ្រាមរយៈពេល ៣ខែ។

មួយម៉ោងបន្ទាប់ពីចូល​ពាក់កណ្តាលអធ្រាត្រ លោក Trump បានបង្ហោះនៅលើបណ្ដាញ​សង្គម​ Truth Socia ថា «អ៊ីរ៉ង់ពិតជាចង់ធ្វើកិច្ចព្រមព្រៀងមួយ ហើយវានឹងក្លាយជាកិច្ចព្រមព្រៀងដ៏ល្អមួយសម្រាប់សហរដ្ឋអាមេរិក និងអ្នកដែលឈរជាមួយយើង»។ តែ​យ៉ាងណាក្ដី លោក Trump ក៏បានលើក​ឡើង​ផងដែរថា វាធ្វើឲ្យរូប​លោក​​កាន់តែពិបាក ក្នុងការចរចាជាមួយអ៊ីរ៉ង់ ដោយសារមាន​ការអត្ថាធិប្បាយនយោបាយគ្រប់យ៉ាង​ នៅ​ជុំវិញជម្លោះនេះ។

លោក​ប្រធានាធិបតីបានសរសេរនៅលើបណ្ដាញ​សង្គម​ Truth Social ថា៖ «វាធ្វើ​ឲ្យ​ខ្ញុំ​កាន់​តែ​ពិបាកខ្លាំង​ ក្នុងការធ្វើការងារ និងចរចាឲ្យបានសម​ស្រប​ នៅពេលដែលក្រុម​នយោបាយផ្ដេសផ្ដាស នៅតែបន្តស្រែករិះគន់​ប្រកប​ដោយ​​ភាព​អវិជ្ជមាន ពោល​គឺ​ក្នុងកម្រិតដែលមិនធ្លាប់មានពីមុនមក ម្តងហើយម្តងទៀត ដែល​ថា ខ្ញុំគួរតែចាត់​វិធាន​ការ​ឲ្យបាន​លឿន​ជាងមុន ឬចាត់​វិធានការ​យឺតៗ ឬខ្លះ​ឲ្យ​ទៅធ្វើសង្គ្រាម ឬខ្លះ​មិនឲ្យ​ធ្វើសង្គ្រាម ឬអ្វីក៏ដោយ» ។ លោកសង្កត់ធ្ងន់​ថា៖ ​«សូម​ឈប់​បារម្ភទៅ​ ហើយសម្រាកចុះ​ អ្វីៗនឹងដំណើរការទៅដោយរលូន នៅទីបំផុត​ វាគឺ​តែងតែដូច្នោះ!»។

គួរ​បញ្ជាក់​ថា លោក Trump បាននិយាយកាលពីថ្ងៃសុក្រចុងសប្ដាហ៍​កន្លង​មក​ថា លោកនឹងសម្រេចចិត្តក្នុងពេលឆាប់ៗនេះ ជុំវិញកិច្ចព្រមព្រៀងដែលត្រូវបានស្នើឡើង ដើម្បីបន្ថែម​ពេល​វេលា​នៃ​បទឈប់បាញ់ជាមួយអ៊ីរ៉ង់៕