​

វិមានក្រឹមឡាំង នៅ​ថ្ងៃចន្ទ (ទី១ ខែមិថុនា ឆ្នាំ២០២៦) នេះ បានប្រាប់​ឲ្យ​ដឹង​ថា ការស្ទាក់ចាប់ដោយ​បារាំង​ សម្រាប់​នាវាដឹកប្រេងក្រោមទណ្ឌកម្មអន្តរជាតិដែលធ្វើដំណើរពីរុស្ស៊ី នៅមហាសមុទ្រអាត្លង់ទិក គឺ «ខុសច្បាប់»។

នៅក្នុងសន្និសីទសារព័ត៌មានមួយនៅទីក្រុងមូស្គូ អ្នកនាំពាក្យ លោក​ Dmitry Peskov បានប្រាប់អ្នកសារព័ត៌មានថា៖ «យើងចាត់ទុកសកម្មភាពបែបនេះថា ខុសច្បាប់ និងស្ទើរ​តែ​ដូច​ទៅ​នឹង​ទង្វើ​របស់​ចោរសមុទ្រអន្តរជាតិ»។

លោក Peskov បានបដិសេធការអះអាង ដែល​ថា ការឃាត់ទុកនាវា​ដែលធ្វើដំណើរពីរុស្ស៊ី គឺអនុលោមតាមច្បាប់អន្តរជាតិ។ លោកបានបន្ថែមថា រុស្ស៊ីកំពុងចាត់វិធានការមួយចំនួន ដើម្បីធានាសុវត្ថិភាព សម្រាប់​ទំនិញរបស់ខ្លួន ហើយនឹងបន្តចាត់វិធានការទាំងនេះ «ដោយគិត​ដល់​បទពិសោធន៍អវិជ្ជមានដែលខ្លួនធ្លាប់​ជួប​»។

គួរ​បញ្ជាក់​ថា នៅ​ព្រឹកថ្ងៃ​នេះ ប្រធានាធិបតីបារាំង លោក​ Emmanuel Macron បានបញ្ជាក់​ថា កងទ័ពជើងទឹករបស់ប្រទេសលោក បានស្ទាក់ចាប់​នាវា​ដឹកប្រេងជាប់ទណ្ឌកម្ម​ដែលធ្វើដំណើរចេញ​ពីរុស្ស៊ី នៅមហាសមុទ្រអាត្លង់ទិក ដោយពណ៌នាអំពីចំណាត់​ការ​នេះថា ជាផ្នែកមួយនៃកិច្ចប្រឹងប្រែង ដើម្បីអនុវត្តទណ្ឌកម្ម និងគោរពច្បាប់សមុទ្រ៕