​

អ៊ីរ៉ង់ បានព្រមាននៅ​ថ្ងៃចន្ទ (ទី១ ខែមិថុនា ឆ្នាំ២០២៦) នេះ​ថា ខ្លួននឹងមិនស្ទាក់ស្ទើរ ក្នុងការជួយលីបង់ទប់ទល់នឹង «ការឈ្លានពានខុសច្បាប់» របស់អ៊ីស្រាអែលលើប្រទេសនេះទេ។

ដោយ​ត្រូវបានដកស្រង់ដោយទីភ្នាក់ងារសារព័ត៌មានរដ្ឋ IRNA អ្នកនាំពាក្យក្រសួងការបរទេសលោក Esmaeil Baqaei បានប្រាប់សន្និសីទសារព័ត៌មានមួយថា៖ «យើងបានសង្កត់ធ្ងន់ និងបន្តសង្កត់ធ្ងន់ថា បទឈប់បាញ់ នៅប្រទេស​លីបង់ គឺជាផ្នែកសំខាន់មួយនៃបទឈប់បាញ់ណាមួយ និងកិច្ចព្រមព្រៀងចុងក្រោយណាមួយ ដើម្បីបញ្ចប់សង្គ្រាមជាមួយសហរដ្ឋអាមេរិក»។

នាយករដ្ឋមន្ត្រីអ៊ីស្រាអែល លោក Benjamin Netanyahu នៅថ្ងៃចន្ទនេះ បានបញ្ជាឲ្យ​កងទ័ពធ្វើការវាយប្រហារពីលើ​អាកាស នៅក្នុងរដ្ឋធានីបេរូតរបស់លីបង់ ជា​ការបង្កើន​ភាព​តាន​តឹង​ថ្មី ទោះបីជាមានបទឈប់បាញ់ដែលកំពុងបន្តនៅក្នុងប្រទេសលីបង់ក៏ដោយ។

ជាមួយ​គ្នានេះ លោក Baqaei បាននិយាយថា៖ «ទីក្រុងតេអេរ៉ង់មិនកំពុងចរចាជាមួយទីក្រុងវ៉ាស៊ីនតោនស្ដីពី​ព័ត៌មានលម្អិតនៃកម្មវិធីនុយក្លេអ៊ែររបស់ខ្លួន នាពេលបច្ចុប្បន្ននេះទេ​។ នៅដំណាក់កាលនេះ ការផ្តោត​របស់យើង គឺទៅលើការបញ្ចប់សង្គ្រាម»។

ដោយឡែក លោក Mohammad Bagher Qalibaf ប្រធានសភាអ៊ីរ៉ង់ និងជាអ្នកចរចាជាន់ខ្ពស់​ ក្នុងដំណើរការ​ចរចាជាមួយទីក្រុងវ៉ាស៊ីនតោន បាននិយាយថា ការបិទទឹករបស់សហរដ្ឋអាមេរិក និង «ឧក្រិដ្ឋកម្មសង្គ្រាម» របស់អ៊ីស្រាអែល នៅលីបង់ «គឺជាភស្តុតាងយ៉ាង​ច្បាស់ក្រឡែតនៃការមិនគោរពបទឈប់បាញ់របស់សហរដ្ឋអាមេរិក»៕