ព្រះសីហនុ៖ លោក ផូល ហ្គ្រេវ (Paul Grave) លេខាធិការគណៈកម្មការហិរញ្ញវត្ថុ នៃព្រឹទ្ធសភាសហរដ្ឋអាមេរិក និងក្រុមការងារ បានធ្វើដំណើរទស្សនកិច្ចខេត្តព្រះសីហនុ កាលពីម្សិលមិញ ដើម្បីសិក្សាស្វែងយល់អំពីដំណើរការអភិវឌ្ឍន៍សេដ្ឋកិច្ច និងសង្គម របស់ខេត្តនេះ នាពេលបច្ចុប្បន្ន។

ក្នុងជំនួបជាមួយអភិបាលខេត្តព្រះសីហនុ ឯកឧត្ដម គួច ចំរើន និងមន្ទីរ ស្ថាប័នពាក់ព័ន្ធ លោក ផូល ហ្គ្រេវ (Paul Grave) បានលើកសរសើរពីការអភិវឌ្ឍរីកចម្រើននៃខេត្តព្រះសីហុន នាពេលបច្ចុប្បន្ន ដែលខុសគ្នាស្រឡះ កាលពីពេល ដែលលោកមកខេត្តនេះ កាលពីឆ្នាំ១៩៩៤។

លោក បានសម្ដែងមោទនភាពចំពោះការរីកដុះដាលនូវអគារសណ្ឋាគារ ខុនដូខ្ពស់ៗ និង​បាន​លើកឡើងពីបញ្ហាអវិជ្ជមានមួយចំនួនផងដែរ ដែលត្រូវបានផ្សព្វផ្សាយ ដើម្បីឱ្យអាជ្ញាធរខេត្តនេះ​បកស្រាយ​ជូនលោកជ្រាប។

ឯកឧត្តម គួច ចំរើន អភិបាលខេត្តព្រះសីហនុ បានបញ្ជាក់ថា រាជរដ្ឋាភិបាល បានបើក​ចំហរ​ស្វាគមន៍​រាល់ការវិនិយោគពីបណ្តាប្រទេសនានា​ តែសង្កេតឃើញថា​ អ្នកវិនិយោគចិន បានចូល​មក​ធ្វើការ​វិនិយោគច្រើនជាងគេ ដូចជា អគារពាណិជ្ជកម្ម អគារស្នាក់នៅ សណ្ឋាគារ កាស៊ីណូ និងវិស័យផ្សេងៗទៀត ​ដែលបានផ្តល់ការងារជូនប្រជាពលរដ្ឋច្រើន។

ឯកឧត្ដម បានបញ្ជាក់ថា ខេត្ដព្រះសីហនុ មិនមាន China Town នោះទេ បើទោះជាតំបន់អូរត្រេះ គឺជា​ប្រជុំអគារពា ណិជ្ជកម្ម សណ្ឋាគារ កាស៊ីណូ នៃការវិនិយោគរបស់ជនជាតិចិន តែស្ថិត​នៅ​ក្នុងការគ្រប់គ្រងរបស់អាជ្ញាធរខេត្ដ និងច្បាប់នៃកម្ពុជា។

ចាប់ពីឆ្នាំ២០០៧ដល់ឆ្នាំ២០១៩ ប្រតិភូកងទ័ពជើងទឹក និងអនុព័ន្ធយោធាអាមេរិក ធ្លាប់ទៅ​បំពេញ​ទស្សនកិច្ចមូលដ្ឋានសមុទ្រ២៤លើក។ ការចូលចតនាវាចម្បាំងសហរដ្ឋអាមេរិកនៅខេត្តព្រះសីហនុ ៣១លើក ស្មើនឹង៣៦គ្រឿង ព្រមទាំងធ្វើ លំហាត់ហ្វឹកហ្វឺន រវាងកងទ័ពអាមេរិក ជាមួយកង​ទ័ពជើង​ទឹកមូលដ្ឋានសមុទ្រ ​ចាប់ពីឆ្នាំ១៩៩៦ ​មកដល់បច្ចុប្បន្ន ​១៧លើក ព្រមទាំងបានឧបត្ថម្ភគាំទ្រ​លើវិស័យផ្សេងៗ មានវិស័យអប់រំ សុខាភិបាល បរិស្ថាន និងការផ្លាស់ប្ដូរវប្បធម៌ជាដើម។

ខេត្តព្រះសីហនុ បានបង្កើតទំនាក់ទំនងខេត្ត-ក្រុងបងប្អូនជាមួយទីក្រុង ស៊ីអាថុល (Seattle) សហរដ្ឋអាមេរិក ចាប់តាំងពីឆ្នាំ២០០០ និងទទួលបានជំនួយមនុស្សធម៌ ​ការពិនិត្យព្យាបាលជំងឺទូទៅ ព្យាបាលវះកាត់ភ្នែក ២លើក។ ឆ្នាំ២០២១ កន្លងមក សហរដ្ឋអាមេរិក បានបន្តរុករកអដ្ឋិធាតុកងទ័ព​អាមេរិកនៅកោះតាង​ ដែលបានស្លាប់ក្នុងសម័យខ្មែរក្រហម។ ទីក្រុង ស៊ីអាថុល បានផ្ដល់​អំណោយ​ជា​គ្រឿងឧបភោគបរិភោគដល់ប្រជាពលរដ្ឋក្រីក្រក្នុងខេត្តព្រះសីហនុ​ ប្រមាណ៣០០គ្រួសារ ដែលមានទឹកប្រាក់ស្មើនឹង៨ពាន់ដុល្លា។

ឯកឧត្តម គួច ចំរើន បានស្នើសុំប្រតិភូអាមេរិកនេះ ​ជួយជំរុញដល់ទីក្រុងស៊ីអាថុល បន្តទំនាក់ទំនង​ឱ្យជិតស្និទ្ធ និងរិតចំណងមិត្តភាពឱ្យកាន់តែល្អប្រសើរ និងជួយផ្សព្វផ្សាយដល់អ្នកវិនិយោគអាមេរិក​មកទស្សនា ​និងស្វែងរកឱ្យកាសវិនិយោគ ​នៅខេត្តព្រះសីហនុ៕

អត្ថបទ៖ គង់ ប៊ុន ថា