សៀមរាប៖ រថយន្តសង្គ្រោះបន្ទាន់ចំនួន០៨គ្រឿង និងរថយន្តពន្លត់អគ្គិភ័យ៥គ្រឿង ត្រូវបានរដ្ឋបាលខេត្តឃ្យុងជី ប្រទេសកូរ៉េខាងត្បូង ប្រគល់ជូនរដ្ឋបាលខេត្តសៀមរាប ដែលការផ្ដល់រថយន្ដនេះ បានធ្វើឡើងជាបន្តបន្ទាប់ចាប់តាំងពីឆ្នាំ២០១៩ ដើម្បីបម្រើផលប្រយោជន៍សាធារណៈនៅក្នុងខេត្ត។

លោក ពិន ប្រាកដ អភិបាលរងខេត្ដសៀមរាប បានថ្លែងអំណរគុណដល់តំណាងរដ្ឋបាលខេត្តឃ្យុងជី និងអង្គការមូលនិធិកិច្ចការសង្គម Go&Do ដែលលោក​បានលើកឡើងថា ការផ្តល់ជូននូវរថយន្តយន្តសង្គ្រោះបន្ទាន់ និងរថយន្តពន្លត់អគ្គិភ័យ​របស់រដ្ឋបាលខេត្តឃ្យុងជីនាពេលកន្លងមក វាពិតជាមានសារសំខាន់ណាស់នៅក្នុងការបម្រើផល​ប្រយោជន៍សាធារណៈនៅក្នុងខេត្តសៀមរាប ជាពិសេសនៅក្នុងការជួយសង្គ្រោះអ្នកជំងឺ និងការអន្តរាគមន៍លើគ្រោះអគ្គិភ័យផ្សេងៗ។

លោក បានបន្តថា នៅក្នុងទូទាំងខេត្តសៀមរាប មានមណ្ឌលសុខភាពចំនួន៩៣ ប៉ុន្តែមណ្ឌល​សុខភាពខ្លះ ​នៅមិនទាន់មានរថយន្ត​សង្គ្រោះបន្ទាន់នៅឡើយ ។ ដូច្នេះក្នុងនាមរដ្ឋបាល​ខេត្តសៀមរាប លោកសូមអំពាវនាវដល់សប្បុរសជន ​និងរដ្ឋបាលខេត្តឃ្យុងជី បន្តជួយបន្ថែម​ជា​បន្តទៀត។

កាលពីឆ្នាំ២០១៩ រដ្ឋបាលខេត្តឃ្យុងជី បានផ្តល់ជូនខេត្តសៀមរាប នូវរថយន្តសង្គ្រោះបន្ទាន់​ចំនួន ០៤​គ្រឿង​ រថយន្តពន្លត់អគ្គិភ័យ០២គ្រឿង ។ ​នៅឆ្នាំ២០២០ ខេត្តនេះ ក៏បានប្រគល់ជូននូវ​រថយន្ត​ពន្លត់អគ្គិភ័យ​មួយគ្រឿង ​និងនៅឆ្នាំ២០២១ ខេត្តឃ្យុងជី ក៏បានប្រគល់ជូននូវរថយន្តសង្គ្រោះ​បន្ទាន់​៤គ្រឿង ​និងរយន្តពន្លត់អគ្គិភ័យចំនួន០២គ្រឿង។

តំណាងរដ្ឋបាលខេត្តឃ្យុងជី លោក Park Woo-hee បាននិយាយថា លោកពិតជារីករាយ​នៅ​ពេល​ដែលលោកបានឃើញរថយន្ត ​ដែលជាជំនួយរបស់រដ្ឋបាលខេត្តឃ្យុងជីនេះ ត្រូវបានរដ្ឋបាល​ខេត្ត​សៀមរាប ​យកមកប្រើប្រាស់បានចំគោលដៅយ៉ាង​មានប្រសិទ្ធភាព។

ចំពោះសំណូមពររបស់រដ្ឋបាលខេត្តសៀមរាប ​លោកនឹងដាក់ជូនថ្នាក់ដឹកនាំខេត្តឃ្យុងជី ដើម្បី​ធ្វើការ​ពិនិត្យ​ពិចារណា៕ អត្ថបទ៖ ឈិត សាវី