មណ្ឌលគិរី៖ ក្រុមការងាររាជរដ្ឋាភិបាល និងអាជ្ញាធរស្រុកអូររាំង នៃខេត្តមណ្ឌលគិរី បានបន្តសកម្មភាពចុះដល់ខ្នងផ្ទះប្រជាពលរដ្ឋ ពិសេសនៅតំបន់ដាច់ស្រយាល ដើម្បីបានដឹងពីសុខទុក្ខរបស់ពួកគេ ដើម្បីអាចជួយដោះស្រាយបានភ្លាមៗ។

នៅក្នុងវេទិកាសាធារណៈ កាលពីម្សិលមិញ នៅភូមិឧបសម្ព័ន្ធទួលស្វាយ ឃុំដាក់ដាំ ស្រុកអូររាំង ដែលជាតំបន់ដាច់ស្រយាលមួយ ជាប់ព្រំដែនប្រទេសវៀតណាម ក្រុមការងាររាជរដ្ឋាភិបាលចុះជួយ​ស្រុក និងអាជ្ញាធរ បានជួបជាមួយប្រជាពលរដ្ឋប្រមាណ១៥០គ្រួសារ ដើម្បីស្ដាប់ពីទុក្ខកង្វល់ បញ្ហា​ប្រឈមនានា ពិសេសគឺអ្វីដែលប្រជាពលរដ្ឋត្រូវការជាចាំបាច់ និងអនុញ្ញាតឱ្យលើកឡើងសំណូម​ទៅកាន់​ថ្នាក់ដឹក​នាំដោយផ្ទាល់ ​និងមានការឆ្លើយតមភ្លាមៗ ។

នៅទីនោះប្រជាពលរដ្ឋ បានលើកឡើងនូវសំណូមស្រដៀងគ្នា ដោយពួកគេស្នើក្រុមការងារ​ថ្នាក់ជាតិ ​និងអាជ្ញាធរមូលដ្ឋាន ​ជួយសម្រួលផ្លូវធ្វើដំណើរ ​បង្កើតឲ្យមានសាលារៀន មណ្ឌលសុខភាព ​និងស្នើសុំអណ្ដូងទឹកស្អាតបន្ថែមជាដើម ។

ប្រធានក្រុមការងាររាជរដ្ឋាភិបាលចុះជួយមូលដ្ឋានស្រុកអូររាំង ឯកឧត្ដម ជា ជន បានបញ្ជាក់ថា អាជ្ញាធរស្រុក​ នឹងស្ថាបនាជូនពលរដ្ឋនៅឆ្នាំ២០២២នេះ និងបានសំណូមពរដល់ពលរដ្ឋឱ្យខិតខំ​ដាំដំណាំផ្សេងៗ​ និងកុំកាប់ព្រៃឈើបន្តទៀត ។ ចំពោះបញ្ហាមណ្ឌលសុខភាព ឯកឧត្ដម នឹង​ពិភាក្សាជាមួយមន្ទីរសុខាភិបាលខេត្ត​ ចំណែកសាលារៀន នឹងសាងសង់​ជូន​នាពេលឆាប់ៗ​ខាងមុខ។

ឯកឧត្ដម បានបញ្ជាក់ថា ចំពោះការស្នើសុំអណ្ដូងទឹកស្អាត​ ក្រុមការងារនឹងរកមូលនិធិបន្ទាន់ ដើម្បី​ខួងអណ្ដូង​ទឹកស្អាត​ជូនពលរដ្ឋប្រើប្រាស់ ​ព្រោះនេះជារឿងចាំបាច់ ។

អភិបាលស្រុកអូររាំង លោក សៀក មុន្នី បានសំណូមពរពលរដ្ឋឲ្យខិតបង្កបង្កើនផល​ដំណាំផ្សេងៗ​បន្ថែមទៀត ហើយប្រសិនបើ​ប្រជាពលរដ្ឋចាប់អារម្មណ៍​ជាមួយការដាំដំណាំ​ដូងពូជ​ពីក្រៅប្រទេស លោកនឹងស្នើសុំទៅក្រុមហ៊ុនសម្បទាន យកទាំងពូជដំណាំ និងផ្នែកបច្ចេកទេសបណ្ដុះបណ្ដាល​ផងដែរ និងធានាទីផ្សារជូនប្រជាកសិករទៀតផង។

លោក បានបញ្ជាក់ថា ប្រសិនបើប្រជាពលរដ្ឋក្នុងភូមិមានរឿងចាំបាច់បន្ទាន់ផ្សេងៗ តួយ៉ាង​ដូចជា​ស្ត្រីមានផ្ទៃពោះឆ្លងទន្លេ​ គ្មានមធ្យោបាយធ្វើដំណើរជាដើម ​អាចទាក់ទង​មក​លោកផ្ទាល់ ឬ​អាចទាក់ទងអាជ្ញាធរភូមិ ​ដើម្បីរាយការណ៍មក​លោកបន្ទាន់ លោកនឹងរកមធ្យោបាយ​ជួយ​សម្រាល​ការ​លំបាករបស់ពលរដ្ឋ៕ អត្ថបទ៖ អ៊ិត ភីរុណ