លោក Marco Rubio រដ្ឋមន្ត្រីការបរទេសសហរដ្ឋអាមេរិក បានប្រាប់សមាជិកសភាកាលពីថ្ងៃអង្គារ ទី២ ខែមិថុនា ថា រដ្ឋបាលលោក Trump មិនចង់បង្ខំពលរដ្ឋអាហ្វហ្គានីស្ថានដែលបច្ចុប្បន្នជាប់គាំងខ្លួននៅក្នុងប្រទេសកាតា ឱ្យវិលត្រឡប់ទៅប្រទេសអាហ្វហ្គានីស្ថានវិញទេ និងបានពិភាក្សាជាមួយប្រទេសយ៉ាងហោចណាស់ចំនួន៥ ដែលបើកទូលាយសម្រាប់ការទទួលយកពួកគេ។

មនុស្សជាង១.១០០នាក់ត្រូវបានឃុំខ្លួននៅអតីតជំរំមូលដ្ឋានកងទ័ពអាមេរិក As Sayliyah (CAS) ចាប់តាំងពីដើមឆ្នាំមុន នៅពេលដែលរដ្ឋបាលរបស់ប្រធានាធិបតីគណបក្សសាធារណរដ្ឋ លោក Donald Trump បានបញ្ឈប់ការតាំងលំនៅថ្មីសម្រាប់ពលរដ្ឋអាហ្វហ្គានីស្ថានជាអ្នកដែលព្រួយបារម្ភការសងសឹកពីអាជ្ញាធរតាលីបង់ ចំពោះទំនាក់ទំនងរបស់ពួកគេជាមួយយោធាសហរដ្ឋអាមេរិក។

លោកRubio ត្រូវបានដាក់សម្ពាធដោយសមាជិកសភាគណបក្សប្រជាធិបតេយ្យ លោកស្រី Grace Meng លើមូលហេតុដែលរដ្ឋបាលលោក Trump អនុញ្ញាតឱ្យពលរដ្ឋអាហ្វ្រិកខាងត្បូងស្បែកសរាប់ពាន់នាក់ចូលសហរដ្ឋអាមេរិកជាជនភៀសខ្លួន ខណៈបដិសេធការចូលចំពោះពលរដ្ឋអាហ្វហ្គានីស្ថាន ដែលត្រូវបានត្រួតពិនិត្យច្បាស់លាស់រួចហើយ។

លោក Rubio បាននិយាយថា ពលរដ្ឋអាហ្វ្រិកខាងត្បូងស្បែកសមានសមត្ថភាព «រួមបញ្ចូល» ទៅក្នុងសង្គមអាមេរិកបានល្អប្រសើរជាង។ លោក Rubio បាននិយាយថា «វាស្ថិតនៅក្នុងផលប្រយោជន៍ជាតិរបស់យើង យើងអនុញ្ញាតឱ្យមនុស្សជាច្រើននៅក្នុងប្រទេសរបស់យើង គឺជាអ្នកដែលអាចរួមបញ្ចូលបានទៅក្នុងសង្គម»។