ភ្នំពេញ ៖ បុរសម្នាក់បើកបរ រថយន្តសណ្ដោងទូកុងតឺន័រមួយគ្រឿងសង្ស័យងងុយដេក បានរ៉េចង្កូតទៅបុករបាំងថ្មចែកទ្រូងផ្លូវអស់ចំនួន១១ផ្ទាំង តែមិនបណ្តាល ឲ្យមានអ្នករងរបួស និងប៉ះពាល់ដល់អ្នកធ្វើបាននៅលើដងផ្លូវឡើយ។

ហេតុការណ៍នេះ បានកើតឡើងកាលពីវេលាម៉ោង ៥ និង ៥០នាទីព្រឹក ថ្ងៃទី ២២ ខែមេសា ឆ្នាំ២០២២ ស្ថិតតាមបណ្ដោយផ្លូវលេខ ២៧១ ត្រង់ចំណុចមុខផ្សារហេងលី ក្នុងសង្កាត់​ទឹកល្អក់ទី៣ ខណ្ឌទួលគោក រាជធានីភ្នំពេញ។

តាមប្រភពព័ត៌មាននៅកន្លែងកើតហេតុបានប្រាប់ឲ្យដឹងថាមុនពេលកើតហេតុគេបានឃើញរថយន្តសណ្តោងទូកុងតឺន័រមួយគ្រឿង ពាក់ស្លាកលេខ ភ្នំពេញ 4A-1991 បើកបរ​ដោយបុរស​ម្នាក់​តាមបណ្ដោយផ្លូវលេខ២៧១ ក្នុងទិសដៅពីត្បូងទៅជើង ខណៈពេលមក​ដល់ចំណុច​មុខផ្សារ​ហេងលី សង្ស័យតៃកុងរថយន្តសង្ស័យងងុយដេក ស្រាប់តែរថយន្តបាន​រ៉េចង្កូត​ទៅបុករបាំង​ថ្មពុះចែកទ្រូងផ្លូវអស់ចំនួន១១ផ្ទាំង បណ្ដាលឲ្យរថយន្តរងការខូចខាតផ្នែកខាងមុខ តែមិន​បណ្ដាលឲ្យនរណាម្នាក់រងរបួស និងប៉ះពាល់ដល់អ្នកធ្វើដំណើរនោះទេ។ បណ្ដាលឲ្យ​របាំងថ្ម​ពុំចែក​ទ្រូងផ្លូវខ្ទាតពេញផ្លូវ ត្រូវបាននគរបាលជំនាញ​ស្ទួចរៀបចំទ្រូងឡើងវិញជៀសវាង​បង្កការ​កក់ស្ទះ​ដល់បងប្អូនអ្នកធ្វើដំណើរ ។ ចំណែកតៃកុងរថយន្ត បានចុះពីលើរថយន្តរួចរត់គេចខ្លួន បន្សល់ទុកតែរថយន្តនៅកន្លែងកើតហេតុ។

ក្រោយពេលកើតហេតុកម្លាំងសមត្ថកិច្ចមូលដ្ឋាន រួមកម្លាំងសមត្ថកិច្ចជំនាញបាន​ចុះមក​ដល់​ទីតាំងកើតហេតុរួចធ្វើការវាស់វែងយករថយន្តទៅរក្សាទុកនៅការិយាល័យចរាចរណ៍ជើងគោក នៃស្នងការដ្ឋាននគរបាលរាជធានីភ្នំពេញ ដើម្បីធ្វើការដោះស្រាយ​នៅពេលក្រោយ​តាមនីតិវិធីច្បាប់៕ អត្ថបទ៖ កុម្ភះ