សហព័ន្ធបាល់ទាត់ពិភពលោក (FIFA) បានបើកដំណើរការជាផ្លូវការមជ្ឈមណ្ឌលផ្សព្វផ្សាយអន្តរជាតិ (International Broadcast Centre - IBC) សម្រាប់ព្រឹត្តិការណ៍ FIFA World Cup 2026 នៅកណ្តាលទីក្រុង Dallas រដ្ឋតិចសាសសហរដ្ឋអាមេរិក ដោយមានការចូលរួមពីប្រធាន FIFA លោក Gianni Infantino ខណៈអេក្រង់ត្រួតពិនិត្យរាប់រយគ្រឿងត្រូវបានដំណើរការនៅមជ្ឈមណ្ឌលសន្និបាត Kay Bailey Hutchison Convention Center។
មជ្ឈមណ្ឌល IBC នេះនឹងក្លាយជាទីតាំងស្នាក់ការសំខាន់សម្រាប់ស្ថាប័នសារព័ត៌មាន និងអ្នកផ្សាយបន្តផ្ទាល់មកពីជុំវិញពិភពលោក។ ជាមួយគ្នានេះ វាក៏នឹងទទួលបន្ទុកគ្រប់គ្រងប្រព័ន្ធពិនិត្យវីដេអូជំនួយអាជ្ញាកណ្តាល (VAR) សម្រាប់គ្រប់ការប្រកួតទាំងអស់ផងដែរ។
លើសពីនេះ មជ្ឈមណ្ឌលនេះនឹងត្រួតពិនិត្យ និងគ្រប់គ្រងសញ្ញាកាមេរ៉ាពីទីលានប្រកួតទាំង ១៦ កន្លែង ដែលស្ថិតនៅសហរដ្ឋអាមេរិក ម៉ិកស៊ិក និងកាណាដាដែលជាប្រទេសម្ចាស់ផ្ទះរួម។
មជ្ឈមណ្ឌលដ៏ធំនេះមានផ្ទៃក្រឡាសរុបប្រមាណ ៤៥,០០០ ម៉ែត្រការ៉េ និងត្រូវបានចាត់ទុកជាបេះដូងនៃប្រតិបត្តិការផ្សាយតាមទូរទស្សន៍ វិទ្យុ និងប្រព័ន្ធផ្សព្វផ្សាយឌីជីថល។ បុគ្គលិកផ្នែកផ្សាយបន្តផ្ទាល់ប្រមាណ ២,០០០ នាក់ នឹងបំពេញការងារនៅទីនេះពេញមួយព្រឹត្តិការណ៍។
នេះគឺជាលើកទីពីរហើយដែលទីក្រុង Dallas ទទួលភារកិច្ចធ្វើជាម្ចាស់ផ្ទះមជ្ឈមណ្ឌល IBC បន្ទាប់ពីធ្លាប់រៀបចំក្នុងព្រឹត្តិការណ៍បាល់ទាត់ពិភពលោកកាលពីឆ្នាំ ១៩៩៤៕ អត្ថបទ៖នាង សុភាវុធ









