សហរដ្ឋអាមេរិកកំពុងស្នើឲ្យ​យកពន្ធយ៉ាងហោចណាស់ ១០ភាគរយលើការនាំចូលពីដៃគូពាណិជ្ជកម្មសំខាន់​ៗភាគច្រើន បន្ទាប់ពីការស៊ើបអង្កេតលើទំនិញដែលត្រូវបានចោទប្រកាន់ថា ត្រូវ​បាន​ផលិតដោយប្រើ​ប្រាស់​កម្លាំងពលកម្មដោយបង្ខំ ខណៈដែលប្រធានាធិបតី លោក​ Donald Trump កំពុងស្វែងរកការសាងជញ្ជាំងពន្ធដ៏ទូលំទូលាយ ជាចំណាត់​ដែលត្រូវបានតុលាការកំពូលសហរដ្ឋអាមេរិកលុបចោល។

យោងតាមសេចក្តីថ្លែងការណ៍មួយពីការិយាល័យតំណាងពាណិជ្ជកម្មសហរដ្ឋអាមេរិក បាន​ឲ្យ​ដឹង​ថា អត្រា ១០ភាគរយ នឹងអនុវត្តចំពោះការនាំចូលពីប្រទេសកាណាដា ម៉ិកស៊ិក សហភាពអឺរ៉ុប (EU) កោះ​តៃវ៉ាន់ និងចក្រភពអង់គ្លេស ក្នុងចំណោមកន្លែងផ្សេងទៀត។ ផលិតផលមកពីប្រទេសសេដ្ឋកិច្ចធំៗ​ផ្សេងទៀត រួមមានចិន ឥណ្ឌា ជប៉ុន កូរ៉េខាងត្បូង ប្រេស៊ីល និងស្វីស នឹងត្រូវរង​អត្រាពន្ធ ១២,៥ភាគរយ។

ការិយាល័យពាណិជ្ជកម្មបានបញ្ជាក់​ថា ខ្លួនកំពុងដាក់អត្រាទាប លើទំនិញពីប្រទេសដែលដាក់ការហាមឃាត់ លើបម្រាម​នាំចូលកម្លាំងពលកម្មដោយបង្ខំ ឬបានប្តេជ្ញាធ្វើដូច្នេះ ខណៈពេលដែលប្រទេសដែល «មិនបានដាក់ចេញ​វិធានការ​នោះ​ និងអនុវត្តប្រកបដោយប្រសិទ្ធភាព» ត្រូវ​រង​អត្រា​ពន្ធ​ខ្ពស់​។

ចំណាត់​ការ​នេះ គឺជាជំហានដ៏សំខាន់មួយ នៅ​ក្នុងការជំរុញរបស់លោក Trump ឲ្យ​ស្ដារឡើងវិញនូវពន្ធគយតាមប្រទេសនីមួយៗដែលលោក​បានដាក់ក្នុងតំណែងឆ្នាំដំបូង​របស់លោក មុនពេលវិធានការ​ទាំង​នោះ​ត្រូវបានចាត់ទុកថា មិនស្របតាមរដ្ឋធម្មនុញ្ញ៕