ប្រភពចំនួន ២ របស់រដ្ឋាភិបាល បានឲ្យ​ដឹង​ថា រដ្ឋមន្ត្រីការពារជាតិបូលីវី បានលាលែងពីតំណែងកាល​ពី​ថ្ងៃអង្គារ (ទី២ ខែមិថុនា ឆ្នាំ២០២៦) បន្ទាប់ពីមាន​ការតវ៉ាប្រឆាំងរដ្ឋាភិបាលរយៈពេល ១ខែ ដោយ​នេះ​គឺ​ជាការចាកចេញរបស់មន្ត្រី​​កម្រិតខ្ពស់បំផុត ក្រោមការ​ដឹកនាំ​របស់​ប្រធានាធិបតីកណ្តាលនិយម លោក Rodrigo Paz ដែលខ្លួនលោក​ផ្ទាល់កំពុងប្រឈមនឹងការអំពាវនាវឲ្យ​លាលែងពីតំណែង​។

ការបោះឆ្នោតជ្រើសរើសលោក Paz ដែលបានចូលកាន់តំណែងក្នុងខែវិច្ឆិកា បានបញ្ចប់ការគ្រប់គ្រងរបស់ក្រុម​ឆ្វេងនិយមជិត ២ទសវត្សរ៍។ ក្រុមអ្នកតវ៉ា ក្នុង​នោះ​រួមមាន​ទាំងសហជីពកម្មករ និងក្រុមដែលស្មោះត្រង់នឹងអតីតប្រធានាធិបតីឆ្វេងនិយម លោក​ Evo Morales ផងដែរ​ កំពុងទាមទារឲ្យ​រដ្ឋាភិបាលរបស់លោក Paz ដកវិធានការរឹតត្បិត និងដោះស្រាយការចំណាយខ្ពស់​លើការរស់នៅ។

ប្រភពមួយ​បានឲ្យ​ដឹង​ថា លោក Ernesto Justiniano អនុរដ្ឋមន្ត្រីដែលពាក់ព័ន្ធនឹងកិច្ចប្រឹងប្រែងប្រយុទ្ធ​ប្រឆាំងនឹងការជួញដូរគ្រឿងញៀន ត្រូវបានតែងតាំងឲ្យ​ជំនួសតំណែង​រដ្ឋមន្ត្រីការពារជាតិបច្ចុប្បន្ន គឺ​លោក Marcelo Salinas។ ប្រព័ន្ធផ្សព្វផ្សាយក្នុងស្រុកបានរាយការណ៍ រដ្ឋមន្ត្រីអប់រំ លោកស្រី​ Beatriz Garcia ក៏បានលាលែងពីតំណែងផងដែរ កាល​ល្ងាចថ្ងៃអង្គារ។

កាលពីដើមខែឧសភា លោក​ប្រធានាធិបតី Paz បានប្រកាសថា លោកនឹងរៀបចំគណៈរដ្ឋមន្ត្រីរបស់លោកឡើងវិញ បន្ទាប់ពីមាន​ការតវ៉ា។ ជម្លោះនេះ បានចាប់ផ្តើមជាមួយនឹងកូដកម្មរបស់កម្មករ នៅក្នុងខែឧសភា ដោយ​បានរាល​រហូត​ដល់មាន​ការបិទផ្លូវហាយវេ ដែលកាត់ផ្តាច់ការចូលទៅកាន់ទីក្រុងជិតខាង គឺ La Paz និង El Alto ដែលមានប្រជាជនប្រមាណ ២លាននាក់រស់នៅ៕