ប្រទេសចិន នៅថ្ងៃពុធ (ទី៣ ខែមេសា ឆ្នាំ២០២៦) នេះ បានអំពាវនាវឲ្យ​សហរដ្ឋអាមេរិក និងអ៊ីរ៉ង់ «គោរព» បទឈប់បាញ់ ដោយជំរុញ​ភាគីជម្លោះ កុំ​បង្កក​ «សង្គ្រាមថ្មី»។

អ្នកនាំពាក្យក្រសួងការបរទេស លោកស្រី Mao Ning បានប្រាប់អ្នកសារ​ព័ត៌មាននៅទីក្រុងប៉េកាំងថា៖ «ប្រទេសចិនមានក្ដី​បារម្ភយ៉ាងខ្លាំង ចំពោះស្ថានភាពបច្ចុប្បន្ន»។

សេចក្តីថ្លែងការណ៍របស់រដ្ឋាភិបាលចិន បានកើតឡើងបន្ទាប់ពីសហរដ្ឋអាមេរិក បានបញ្ជាក់​ថា ខ្លួនបានធ្វើការវាយប្រហារលើកោះ Qeshm ដើម្បី​ជា​ «ការឆ្លើយតបទៅនឹងការប៉ុនប៉ងវាយប្រហារដោយអ៊ីរ៉ង់ នៅទូទាំងតំបន់​មជ្ឈិមបូព៌ា»។

ទីក្រុង​វ៉ាស៊ីនតោន​បានបន្ថែមថា កងទ័ពសហរដ្ឋអាមេរិក និងកងកម្លាំងយោធាដៃគូរបស់ខ្លួន បានស្ទាក់ចាប់មីស៊ីល និងយានដ្រូន​របស់អ៊ីរ៉ង់ជាច្រើន។ ហើយ​ប្រទេសកូវ៉ែត ក៏បានឲ្យ​ដឹង​ផងដែរថា ប្រព័ន្ធការពារដែនអាកាសរបស់ខ្លួន បានឆ្លើយតបទៅនឹងការវាយប្រហារដោយមីស៊ីល និងយានដ្រូន​ «អរិភាព» នៅព្រឹកព្រលឹមថ្ងៃពុធនេះ​។

លោកស្រី Mao បានលើក​ឡើង​ថា៖ «សង្គ្រាមថ្មីនេះ មិនផ្ដល់​ផលប្រយោជន៍ដល់​ភាគី​ណាឡើយ»។ លោកស្រីបានបន្ថែមថា៖ «យើងសង្ឃឹមថា ភាគីពាក់ព័ន្ធអាចផ្ដល់​តម្លៃដល់ឱកាសនៃការមាន​សន្តិភាព គោរពការប្តេជ្ញាចិត្តផ្អាក​ការ​ប្រយុទ្ធ​ និងបន្ត​រក្សាសន្ទុះនៃការចរចា ប្រកាន់ខ្ជាប់នូវការដោះស្រាយជម្លោះ តាមរយៈមធ្យោបាយនយោបាយ និងការទូត និងសម្រេចបាននូវបទឈប់បាញ់គ្រប់​ជ្រុង​ជ្រោយ និងយូរអង្វែង ឲ្យ​បាន​ឆាប់​តាម​ដែល​អាច​ ហើយ​បង្កើតលក្ខខណ្ឌចាំបាច់ ដើម្បី​ស្តារសន្តិភាព និងភាពស្ងប់ស្ងាត់ឡើង​វិញ នៅតំបន់​មជ្ឈិមបូព៌ា»៕