បុរសម្នាក់បានឃាំង​ខ្លួនឯងនៅខាងក្នុងអគារមួយកន្លែង​ ក្នុងរដ្ឋ California សហរដ្ឋអាមេរិក កាលពីថ្ងៃអង្គារ (ទី២ ខែមិថុនា ឆ្នាំ២០២៦) ដោយបានចាប់មនុស្សមួយចំនួនធ្វើជាចំណាប់ខ្មាំង បន្ទាប់ពីនគរបាល​បានទទួលរបាយការណ៍ អំពីការគំរាមកំហែងដោយគ្រាប់បែក។

បើយោងតាមប្រព័ន្ធ​ផ្សព្វផ្សាយ​ ​​NBC News បាន​ឲ្យ​ដឹង​ថា អ្នកនាំពាក្យនគរបាល លោកស្រី​ Sally Selby បាននិយាយថា មនុស្សជាច្រើននាក់ស្ថិត​នៅខាងក្នុងអគារនៃ​ទីក្រុង Bakersfield នៅពេលដែលមន្រ្តីនគរបាល​បានឆ្លើយតប។ អ្នកចរចាវិបត្តិ កំពុងធ្វើការ ដើម្បីធានាឲ្យ​មាន​ដំណោះស្រាយដោយសន្តិវិធី។

នគរបាល​បានឲ្យ​ដឹង​ថា ចំណាប់ខ្មាំងទី២ ត្រូវបានដោះលែងភ្លាមៗ ក្រោយ​ម៉ោង ៩យប់ ម៉ោង​ក្នុង​ស្រុក​ (ត្រូវ​នឹង​ម៉ោង ៤:០០ ម៉ោង​សកល នា​ថ្ងៃពុធនេះ) បន្ទាប់ពីមាន​ការដោះលែងចំណាប់ខ្មាំងម្នាក់ទៀត នៅមុននោះ នា​ពេលល្ងាច។ លោកស្រី​ ​​Selby បាន​បន្ថែម​ថា មិនមានរបាយការណ៍ អំពីការរង​របួសណាមួយ ត្រូវបានរាយការណ៍នៅឡើយទេ​ ហើយក្រុមចរចាវិបត្តិរបស់នាយកដ្ឋាននគរបាល​ក្រុង​ Bakersfield នៅតែទាក់ទងជាមួយជនសង្ស័យ ។

គួរ​បញ្ជាក់​ថា នគរបាល​បានឆ្លើយតបនៅម៉ោងប្រហែល ១រសៀល ម៉ោង​ក្នុង​ស្រុក​ (ត្រូវ​នឹង​ម៉ោង ២០ ម៉ោង​សកល កាលពី​ថ្ងៃអង្គារ) ចំពោះរបាយការណ៍ អំពីការគំរាមកំហែងដោយ​គ្រាប់បែក នៅអគារមួយ នៅប្លុក១៥០០ នៃផ្លូវទី១៧។ បន្ទាប់ពីមន្ត្រីបានបង្កើតបរិវេណសន្តិសុខ អ្នកស្នាក់នៅមួយចំនួន អាចជម្លៀសចេញ។ អាជ្ញាធរក៏បានសម្អាតតំបន់ជុំវិញ និងបិទផ្លូវក្បែរៗនោះផងដែរ៕