ប្រទេសជប៉ុន នៅថ្ងៃពុធ (ទី៣ ខែមិថុនា ឆ្នាំ២០២៦) នេះ បានសម្តែងក្ដី​បារម្ភយ៉ាងខ្លាំង ចំពោះប្រតិបត្តិថ្មើរ​ជើង​របស់អ៊ីស្រាអែល នៅភាគខាងត្បូងលីបង់ ដោយអំពាវនាវឲ្យ​មានការគោរពអធិបតេយ្យភាព និងបូរណភាពទឹកដីរបស់ប្រទេសលីបង់។

សេចក្តីថ្លែងការណ៍មួយពីក្រសួងការបរទេសជប៉ុន បានឲ្យ​ដឹងថា៖ «ប្រទេសជប៉ុនមានក្ដី​បារម្ភជាពន់ពេក ដែល​ថា ការវាយប្រហារ រវាងអ៊ីស្រាអែល និងក្រុម​ហេសបូឡា បានបណ្តាលឲ្យ​មានអ្នកស្លាប់ និងរបួស ក្នុងចំណោមជនស៊ីវិល និងបុគ្គលិកពេទ្យ ក៏ដូចជាការបំផ្លិច​បំផ្លាញហេដ្ឋារចនាសម្ព័ន្ធស៊ីវិល»។

សេចក្តីថ្លែងការណ៍បានបន្ថែមថា៖ «យើងក៏សម្តែងក្ដី​បារម្ភយ៉ាងខ្លាំងផងដែរថា ទោះបីជាមានការអំពាវនាវពីសហគមន៍អន្តរជាតិ ដើម្បី​ធ្វើ​ការអត់ធ្មត់ក៏ដោយ ប្រតិបត្តិការផ្លូវ​គោក​របស់អ៊ីស្រាអែល នៅភាគខាងត្បូងនៃ​ប្រទេសលីបង់ នៅតែបន្តមាន​ដដែល​ ហើយជាថ្មីម្ដង​ទៀត យើងអំពាវនាវឲ្យ​គោរពអធិបតេយ្យភាព និងបូរណភាពទឹកដីរបស់ប្រទេសលីបង់»។

ជាមួយ​គ្នានេះ ប្រទេសជប៉ុនបានអំពាវនាវឲ្យ​ «គ្រប់ភាគីទាំងអស់» បញ្ឈប់អរិភាពជាបន្ទាន់ គោរព​តាមច្បាប់អន្តរជាតិ រួមទាំងច្បាប់មនុស្សធម៌អន្តរជាតិ ដើម្បីអនុវត្តយ៉ាងពេញលេញនូវសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិដែលពាក់ព័ន្ធ ពោលគឺ​អនុវត្តការអត់ធ្មត់ «ឲ្យ​បាន​ខ្ពស់​បំផុត​»។

គួរបញ្ជាក់ថា អ៊ីស្រាអែល​បាន​បន្ត​វាយប្រហារ​តាម​អាកាស​ស្ទើរតែ​រាល់ថ្ងៃ និង​វាយលុកផ្លូវ​គោក ​នៅ​លីបង់ បើទោះបីជា​មាន​បទឈប់បាញ់​ដែល​ចូលជាធរមាន​នៅ​ថ្ងៃទី១៧ ខែមេសា ហើយ​ក្រោយមក​ត្រូវបាន​ពង្រីក​រហូតដល់​ដើមខែកក្កដា​ក៏ដោយ៕