ជនបរទេសរាប់រយនាក់ដែលភ័យខ្លាចចំពោះជីវិតរបស់ពួកគេ បានជ្រកកោននៅក្នុងសាលសហគមន៍ នៅឆ្នេរសមុទ្រភាគខាងត្បូងនៃប្រទេសអាហ្វ្រិកខាងត្បូង ដោយនិយាយថា ហ្វូងមនុស្សក្នុងស្រុក កំពុងដើរពីផ្ទះមួយទៅផ្ទះមួយប្រាប់ពួកគេឲ្យចាកចេញពីប្រទេសនេះ។

ភាគច្រើនជាជនជាតិម៉ាឡាវី និងម៉ូសំប៊ិក មនុស្សជាច្រើនបានប្រាប់សារព័ត៌មាន AFP ថា ពួកគេបានរត់គេចខ្លួនពីផ្ទះរបស់ពួកគេ នៅចុងសប្តាហ៍ ហើយបានចំណាយពេលយប់នៅលើភ្នំ និងគុម្ពឈើ មុនពេលធ្វើដំណើរទៅកាន់មជ្ឈមណ្ឌលសហគមន៍ ក្នុងទីក្រុងតូចៗ។

លោក Thomas Vincent Baloyi ជនជាតិម៉ូសំប៊ិក បានប្រាប់ AFP នៅទីក្រុង Gansbaai មានចម្ងាយប្រហែល ១១០ គីឡូម៉ែត្រ (៧០ម៉ាយ) ភាគអាគ្នេយ៍នៃទីក្រុង Cape Town ថា៖«ពួកគេបាននិយាយថា អ្នកជាជនបរទេស អ្នកមិនមែនជាប្រជាជនរបស់អាហ្វ្រិកខាងត្បូងទេ ដូច្នេះអ្នកត្រូវតែចាកចេញពីប្រទេសនេះ»។

លោក Baloyi ដែលបាននៅក្នុងប្រទេសនេះអស់រយៈពេលជិត ១៦ ឆ្នាំ ធ្វើការក្នុងវិស័យសំណង់ និង ថែសួន បានបញ្ជាក់ថា៖«ខ្ញុំបាននិយាយថា ទេ ខ្ញុំមានឯកសារ ដើម្បីនៅទីនេះ ក្នុងប្រទេសអាហ្វ្រិកខាងត្បូង»។ ពួកគេមិនចង់ដឹងទេ»៕