នៅថ្ងៃពុធ (ទី៣ ខែមិថុនា ឆ្នាំ២០២៦) នេះ ប្រទេស​អ៊ុយក្រែនបានអំពាវនាវឲ្យ​មានការសន្ទនា និងទំនាក់ទំនងជិតស្និទ្ធជាមួយប៉ូឡូញ បន្ទាប់ពីភាពតានតឹងបានផ្ទុះឡើង ជុំវិញការសម្រេចចិត្តរបស់រដ្ឋាភិបាល ក្នុងការដាក់ឈ្មោះអង្គភាពយោធាមួយ តាមឈ្មោះកងទ័ពបះបោរអ៊ុយក្រែន (UPA) ជាកម្លាំងជាតិនិយមដែលទទួលខុសត្រូវ ចំពោះការសម្លាប់រង្គាលជនជាតិ​ប៉ូឡូញរាប់ម៉ឺននាក់ ក្នុងអំឡុងសង្គ្រាមលោកលើកទី២​។

រដ្ឋមន្ត្រីការបរទេសអ៊ុយក្រែន លោក Andrii Sybiha បានលើក​ឡើង​ថា ឈ្មោះអង្គភាពនេះ ត្រូវបានជ្រើសរើសដោយទាហានដែល «មិនមានចេតនាប្រឆាំងនឹងប៉ូឡូញសោះ​ឡើយ​​»។ លោកបានសរសេរនៅលើវេទិកាបណ្ដាញ​សង្គម X ថា៖ «គោលបំណងរបស់ពួកគេ គឺដើម្បីគោរពដល់អ្នកដែលកាលពីច្រើនឆ្នាំកន្លង​ទៅ​ ក៏បានប្រយុទ្ធប្រឆាំងនឹងអធិរាជក្រុងមូស្គូ ការកាន់កាប់ និងការគាបសង្កត់របស់ក្រុម​កុម្មុយនីស្ត Bolshevik»។

លោក Sybiha បានជំរុញឲ្យ​ភាគីទាំង២ «កាត់បន្ថយអារម្មណ៍​មិន​សប្បាយ​ចិត្ត​​ ទុកបញ្ហាប្រវត្តិសាស្ត្ររួមគ្នាទៅឲ្យ​អ្នក​ជំនាញ​ប្រវត្តិសាស្ត្រ និងផ្តោតលើ «សត្រូវរួម» របស់ប្រទេស​ទាំង២ ក៏ដូចជាពង្រឹងសន្តិសុខ​តំបន់​អឺរ៉ុប​។ លោកបានសង្កត់ធ្ងន់​ថា «ការកើនឡើងនូវ​ភាពតានតឹង រវាងអ៊ុយក្រែន និងប៉ូឡូញ មិននាំមកនូវអត្ថប្រយោជន៍ដល់ជនជាតិអ៊ុយក្រែន ឬប៉ូឡូញនោះទេ​»។

គួរបញ្ជាក់​ថា កាល​ពី​ថ្ងៃទី២៦ ខែឧសភា ប្រធានាធិបតី លោក Volodymyr Zelenskyy បានចុះហត្ថលេខាលើក្រឹត្យមួយដែលផ្តល់ងារកិត្តិយសដល់អង្គភាពប្រតិបត្តិការពិសេសមួយ គឺ «វីរបុរសនៃ UPA» ដោយពណ៌នាអំពីការសម្រេចចិត្តនេះថា ជាផ្នែកមួយនៃកិច្ចប្រឹងប្រែង ដើម្បីស្តារប្រពៃណីប្រវត្តិសាស្ត្រនៃកងកម្លាំងយោធាជាតិអ៊ុយក្រែនឡើងវិញ។ ចំណាត់​ការ​នេះបានបង្កឲ្យ​មានការខឹងសម្បាភ្លាមៗ នៅទូទាំងមជ្ឈដ្ឋាន​នយោបាយរបស់ប្រទេសប៉ូឡូញ៕