ប្រព័ន្ធ​ផ្សព្វផ្សាយ​ TVP World បាន​រាយ​ការ​ណ៍​នៅ​ថ្ងៃពុធ (ទី៣ ខែមិថុនា ឆ្នាំ២០២៦) នេះ​ថា សមយុទ្ធកងទ័ពជើងទឹកដឹកនាំដោយអង្គការ​ណាតូ (NATO) និងសហរដ្ឋអាមេរិក គ្រោងនឹងចាប់ផ្តើមនៅសប្តាហ៍នេះ នៅសមុទ្របាល់ទិក ដោយ​កងកម្លាំងត្រូវ​បានកាត់បន្ថយចំនួន​ បើប្រៀបធៀបទៅនឹងឆ្នាំមុន។

ឧត្តមនាវីទោអាល្លឺម៉ង់ លោក​ Stephan Haisch បាននិយាយថា «ក្នុងអំឡុងពេលនេះ វាគឺ​ជាសញ្ញានៃកម្លាំងរបស់សម្ព័ន្ធមិត្ត ដែលសមយុទ្ធដ៏សំខាន់មួយ កំពុងត្រូវបានធ្វើឡើង ក្រោមការដឹកនាំរបស់សហរដ្ឋអាមេរិក ជាមួយនឹងការចូលរួមយ៉ាងទូលំទូលាយរបស់អង្គការ​ណាតូ»។

សមយុទ្ធឈ្មោះ​ BALTOPS ដែលគ្រោងធ្វើឡើងចាប់ពីថ្ងៃទី៤ ខែមិថុនា ដល់ថ្ងៃទី២០ ខែមិថុនា នឹងមាននាវាប្រហែល ២០​គ្រឿង មកពី ១៥ប្រទេស និងបុគ្គលិកប្រហែល ៦.០០០នាក់ ដែលប្រហែលពាក់កណ្តាលនៃទំហំសមយុទ្ធកាលពីឆ្នាំមុន។

យោងតាមមន្ត្រី បាន​ឲ្យ​ដឹង​ថា សមយុទ្ធដែលបានកាត់បន្ថយចំនួន​នេះ ឆ្លុះបញ្ចាំងពីការប្តេជ្ញាចិត្តមាន​ប្រតិបត្តិការដែលកំពុងមាន​ នៅកន្លែងផ្សេងទៀត ក្នុង​នោះ​រួមទាំងការដាក់ពង្រាយ នៅតំបន់​មជ្ឈិមបូព៌ា និងអាកទិកផង​ដែរ។ តែ​យ៉ាងណាក្ដី សមយុទ្ធនេះត្រូវបានគេរំពឹងថា នឹងក្លាយជាសមយុទ្ធកងទ័ពជើងទឹកដ៏ធំបំផុត នៅសមុទ្របាល់ទិក នា​ឆ្នាំនេះ។

សមយុទ្ធ​នេះ​នឹងចាប់ផ្តើមនៅភាគខាងលិចនៃសមុទ្រ​បាល់ទិក មុនពេលផ្លាស់ប្តូរទៅទិសខាងកើត ឆ្ពោះទៅតំបន់ជុំវិញកោះ Gotland របស់ប្រទេស​ស៊ុយអែត។ លោក Haisch បាននិយាយថា ការការពារខ្សែបន្ទាត់ទំនាក់ទំនងតាមសមុទ្រ នៅតែជាបេសកកម្មសំខាន់មួយ ទាំងសម្រាប់ភស្តុភារយោធា និងការដឹកជញ្ជូនពាណិជ្ជកម្ម៕