នាថ្ងៃពុធ (ទី៣ ខែមិថុនា ឆ្នាំ២០២៦)​ នេះ​ នាយករដ្ឋមន្ត្រីដាណឺម៉ាក លោកស្រី Mette Frederiksen បានបង្ហាញគណៈរដ្ឋមន្ត្រីថ្មីរបស់លោកស្រី ដែលជាលើកដំបូងក្នុងប្រវត្តិសាស្ត្ររបស់ប្រទេស​ដាណឺម៉ាក មានស្ត្រីច្រើន​ជាងបុរស។

បន្ទាប់ពីមាន​នូវ​ការចរចាអស់រយៈពេលជាច្រើនខែ ក្រោយ​ការបោះឆ្នោតមិនមាន​សំឡេង​ភាគច្រើន​ដាច់ខាត​ ក្នុងខែមីនា លោកស្រី Frederiksen ដែលកំពុងកាន់តំណែង បានប្រកាស​កាលពី​ថ្ងៃទី១ ខែមិថុនាថា លោកស្រីបានបង្កើតរដ្ឋាភិបាលសំឡេង​ភាគតិចដែលមាន​ ៤គណបក្ស គឺ​គណបក្សសង្គមប្រជាធិបតេយ្យ (Social Democrats) របស់លោកស្រី គណបក្សប្រជាជនសង្គមនិយម (Socialist People’s Party) គណបក្សកណ្ដាល-ឆ្វេងនិយម Radikale Venstre និងគណបក្សកណ្តាលនិយម Moderates។

ហើយ​នៅថ្ងៃទី៣ ខែមិថុនានេះ​ លោកស្រី Frederiksen បានប្រកាសឈ្មោះរដ្ឋមន្ត្រីថ្មី។ លោកស្រី Frederiksen បានប្រកាសនៅខាងក្រៅសភាដាណឺម៉ាកថា៖ «នេះ​គឺ​ជារដ្ឋាភិបាលដែលមានរដ្ឋមន្ត្រីចំនួន ២១រូប ហើយជាលើកដំបូងក្នុងប្រវត្តិសាស្ត្ររបស់​ប្រទេស​ដាណឺម៉ាក ឥឡូវនេះមានរដ្ឋមន្ត្រីជា​ស្ត្រីច្រើនជាងរដ្ឋមន្ត្រីជា​បុរស»។

រដ្ឋមន្ត្រីចំនួន ១១រូប ក្នុងចំណោមរដ្ឋមន្ត្រី ២១រូប គឺជាស្ត្រី ហើយគណៈរដ្ឋមន្ត្រី​ថ្មី​នេះ ក៏រួមបញ្ចូលឈ្មោះដែលធ្លាប់ស្គាល់មាន​ក្នុង​រដ្ឋាភិបាលមុនរបស់លោកស្រី Frederiksen ផងដែរ។

គួរបញ្ជាក់​ថា នៅក្នុងការបោះឆ្នោតខែមីនា គណបក្សសង្គម​ប្រជាធិបតេយ្យរបស់លោកស្រី​ Frederiksen ទទួល​បាន​សន្លឹកឆ្នោត​​តិច​​បំផុត ដែល​ជា​លើក​ដំបូង​ចាប់តាំងពីឆ្នាំ១៩០៣ ប៉ុន្តែនៅតែជាគណបក្សធំបំផុតរហូតមកដល់ពេលនេះ ដោយមាន ៣៨អាសនៈ។ តែយ៉ាង​ណាក្ដី ដោយសារ​គណបក្ស​ទាំង ​៤ ​​ក្នុង​រដ្ឋាភិបាល​ចម្រុះ​ថ្មី​នេះ មាន​​ត្រឹមតែ ៨២អាសនៈ​ ក្នុង​ចំណោម ១៧៩​អាសនៈ ​នៅ​​សភា រដ្ឋាភិបាលនេះ​​នឹង​ត្រូវ​ពឹងលើ​ការ​គាំទ្រ​ពី​គណបក្ស​ដទៃ​ទៀត ​ដើម្បី​អនុម័ត​ច្បាប់៕