ស្ថាប័ន​ការបរទេសរបស់​ទីក្រុង​តៃប៉ិ បានលើក​ឡើង​នៅថ្ងៃពុធ (ទី៣ ខែមិថុនា ឆ្នាំ២០២៦)​ នេះ​ថា កោះ​តៃវ៉ាន់បានស្នើ​ឲ្យ​ជប៉ុន និងហ្វីលីពីន គោរពសិទ្ធិ និងទឹកដីរបស់ខ្លួន នៅពេលដែលប្រទេស​ទាំង២ ធ្វើកិច្ចចរចា ស្ដី​បី​ព្រំដែនសមុទ្រ។

ជប៉ុន និងហ្វីលីពីនបានឲ្យ​ដឹង​កាលពីខែឧសភាថា ភាគី​ទាំង២ នឹងចាប់ផ្តើមកិច្ចចរចាជាផ្លូវការ ស្ដីពី​ការកំណត់ព្រំដែនសមុទ្រនៃតំបន់សេដ្ឋកិច្ចផ្តាច់មុខ និងតំបន់​លាត​សន្ធឹង​ក្រោម​បាតសមុទ្រ រវាងប្រទេសទាំង២ «ស្របតាមច្បាប់អន្តរជាតិ»។

ប្រទេសចិន ដែលចាត់ទុកតៃវ៉ាន់ ដែល​ជាកោះ​ស្វ័យ​គ្រប់គ្រងតាមបែបប្រជាធិបតេយ្យថា ជាទឹកដីរបស់ខ្លួន បានថ្កោលទោសចំណាត់ការ​នេះ។

ស្ថាប័នការបរទេសកោះ​តៃវ៉ាន់ បានលើក​ឡើង​ថា ការិយាល័យតំណាងរបស់ខ្លួន នៅជប៉ុន និងហ្វីលីពីននឹងស្វែងរកការបញ្ជាក់ថា ដំណើរការចរចា និងលទ្ធផលនៃកិច្ចព្រមព្រៀងនាពេលអនាគតណាមួយ «នឹងមិនប៉ះពាល់ដល់សិទ្ធិអធិបតេយ្យភាពដែលកោះ​តៃវ៉ាន់ទទួលបាន ក្រោមច្បាប់អន្តរជាតិទេ»។ ស្ថាប័ន​បានសង្កត់ធ្ងន់​ថា អធិបតេយ្យភាពរបស់កោះ​តៃវ៉ាន់ លើដែន​ដី និងដែនទឹកពាក់ព័ន្ធ ក៏ដូចជាសិទ្ធិរបស់ខ្លួន ក្រោមច្បាប់អន្តរជាតិ គឺ «មិនអាចប្រកែកបាន» ឡើយ​។

ស្ថាប័ន​បានបន្ថែម​ថា ដោយសារតំបន់ដែនសមុទ្រដែលជប៉ុន និងហ្វីលីពីនមានបំណងចរចាកំណត់​ព្រំដែននោះ ត្រួតស៊ីគ្នាជាមួយតំបន់សេដ្ឋកិច្ចផ្តាច់មុខរបស់កោះ​តៃវ៉ាន់ នៅឆ្នេរសមុទ្រភាគខាងកើតរបស់ខ្លួន ទើបដែន​កោះ​នេះ​អំពាវនាវឲ្យ​ប្រទេសទាំង២ ពិចារណាយ៉ាងពេញលេញ អំពីសិទ្ធិ និងផលប្រយោជន៍របស់តៃវ៉ាន់ និងការ​ចូលរួមក្នុងការចរចា។

យ៉ាង​ណាក្ដី នៅពេលត្រូវបាន​សួរ អំពីក្តីបារម្ភរបស់កោះ​តៃវ៉ាន់ រដ្ឋមន្ត្រី​ទទួល​បន្ទុក​ទីស្ដីការ​គណៈរដ្ឋមន្ត្រីជប៉ុន លោក Minoru Kihara បាននិយាយនៅ​ព្រឹកថ្ងៃទី៣ ខែមិថុនានេះ​ថា ប្រសិនបើជប៉ុន និងហ្វីលីពីនយល់ព្រម លើ​ការ​កំណត់​ព្រំដែនដែនសមុទ្រ វានឹង «មិនមានចំណង​ផ្លូវច្បាប់ លើភាគីទី៣ ឡើយ​»។ ចំណែក​ក្រសួងការបរទេសហ្វីលីពីន មិនបានឆ្លើយតបភ្លាមៗនោះទេ ចំពោះសំណើសុំការអត្ថាធិប្បាយ​៕