ទីភ្នាក់ងារ​ការទូតរបស់សហភាពអឺរ៉ុប (EU) បានស្នើថា បេសកកម្មកងទ័ពជើងទឹក Aspides របស់ប្លុកនេះ ត្រូវ​ទទួលយក «តួនាទីចម្បង» ក្នុងការសម្អាតគ្រាប់​មីន នៅច្រកសមុទ្រ Hormuz «នៅពេលដែលលក្ខខណ្ឌនានាអនុញ្ញាត» ដែលជាការចូលរួមចំណែករបស់អឺរ៉ុប ចំពោះគំនិតផ្តួចផ្តើមដឹកនាំដោយបារាំង-អង់គ្លេស។ នេះបើយោងតាមឯកសារមួយដែលទីភា្នក់ងារ​សារព័ត៌មាន Reuters បានឃើញ​។

ស្ថាប័ន​ដោះស្រាយ​កិច្ច​ការ​ខាងក្រៅអឺរ៉ុប (European External Action Service) បានសរសេរនៅក្នុងកំណត់ចំណាំមួយចុះថ្ងៃទី២៦ ខែឧសភាថា៖ «ស្ថានភាពនេះតម្រូវឲ្យ​ EU ផ្តល់ការចូលរួមចំណែកដ៏មានអត្ថន័យដល់សម្ព័ន្ធភាពពិសេសបណ្ដោះអាសន្ន​ដឹកនាំដោយបារាំង និងចក្រភពអង់គ្លេស ដែល​វា​ត្រូវ​កើតឡើងនៅពេលដែលលក្ខខណ្ឌអនុញ្ញាត និងមិន​ពាក់ព័ន្ធ​ជាមួយ​ប្រទេសដែលមានជម្លោះនឹង​គ្នា​»។

ទីភ្នាក់ងារនេះ​បានសរសេរនៅក្នុងកំណត់ចំណាំដែលត្រូវបានចែកចាយទៅកាន់ប្រទេសសមាជិក EU ថា៖ «វាត្រូវបានស្នើឡើងថា នៅពេលដែលលក្ខខណ្ឌអនុញ្ញាត បេសកកម្ម​ EUNAVFOR ASPIDES ត្រូវបានប្រគល់ភារកិច្ចឲ្យ​អនុវត្តតួនាទីចម្បង ក្នុងការសម្អាតគ្រាប់​មីន នៅច្រកសមុទ្រ Hormuz ដែលជាការចូលរួមចំណែករបស់ EU ចំពោះកិច្ចខិតខំប្រឹងប្រែងរបស់សម្ព័ន្ធភាពពិសេសដឹកនាំ​ដោយ​បារាំង-អង់គ្លេស​»។

យ៉ាង​ណាក្ដី ការកែប្រែអាណត្តិបេសកកម្ម Aspides នឹងតម្រូវឲ្យ​មានការឯកភាពគ្នា ហើយវា​នៅតែមិនមាន​ភាព​ច្បាស់​លាស់​នោះទេថា តើប្រទេសជាសមាជិកទាំង ២៧ របស់ EU នឹងគាំទ្រការផ្លាស់ប្ដូរ​បែបនេះដែរ ឬអត់​៕