ប្រតិបត្តិករផ្លូវដែកជាតិ​អ៊ុយក្រែន បាន​ឲ្យ​ដឹង​ថា ប្រមុខ​អង្គការ​ណាតូ (NATO) លោក Mark Rutte បានទៅ​ដល់ទីក្រុងគីវ នៅថ្ងៃពុធ (ទី៣ ខែមិថុនា ឆ្នាំ២០២៦) នេះ សម្រាប់ដំណើរទស្សនកិច្ចដែលមិនបានប្រកាសទុកជាមុន ដោយ​ដំណើរនេះ​កើត​​ឡើង​បន្ទាប់ពីមាន​ការ​វាយ​ប្រហារ​ទ្រង់ទ្រាយ​ធំ​បណ្ដាល​ឲ្យមនុស្ស​ស្លាប់​ជាបន្តបន្ទាប់របស់រុស្ស៊ី លើរដ្ឋធានីរបស់ប្រទេស​​អ៊ុយក្រែន។

ប្រធានាធិបតី លោក​ Volodymyr Zelenskyy ដែលត្រូវបានគេរំពឹងថា នឹងជួបជាមួយលោក Rutte បានអំពាវនាវដល់សមាជិករបស់​ប្លុកការពារជាតិ​មួយ​នេះ​ឲ្យ​ជួយការពារអ៊ុយក្រែន ពីការវាយប្រហារដោយមីស៊ីលបាលីស្ទិក​របស់រុស្ស៊ី។

ប្រតិបត្តិ​ករ Ukrzaliznytsia បានសរសេរនៅលើបណ្ដាញ​សង្គមថា៖ «ថ្ងៃនេះ នៅស្ថានីយ៍រថភ្លើងក្រុង​គីវ យើងសូមស្វាគមន៍អគ្គលេខាធិការអង្គការ​ណាតូ លោក Mark Rutte។ ដំណើរទស្សនកិច្ចនេះ គឺមានសារៈសំខាន់ខ្លាំងណាស់ ដូចដំណើរទស្សនកិច្ចមុនៗដែរ ពីព្រោះវាជាកាយវិការនៃការ​មាន​សាមគ្គីភាព និងការគាំទ្រពីសម្ព័ន្ធមិត្ត សម្រាប់ប្រទេសរបស់យើង»។

ក្រោយមក​ ការបង្ហោះនោះ​ត្រូវបានលុបចោល។ ដំណើរទស្សនកិច្ចរបស់លោក Rutte បានកើតឡើងប៉ុន្មានម៉ោងបន្ទាប់ពីយានដ្រូន​របស់អ៊ុយក្រែន បានវាយប្រហារទីតាំងថាមពល និងយោធា ក្នុងទីក្រុង Saint Petersburg នៅ​ភាគខាងជើងនៃប្រទេសរុស្ស៊ី ជាកន្លែងដែលមន្ត្រី និងឥស្សរជនកំពុងធ្វើ​ទស្សនកិច្ច​ ប្រមូលផ្តុំគ្នា សម្រាប់វេទិកាសេដ្ឋកិច្ចដ៏សំខាន់មួយ៕