ប្រធានាធិបតីអាមេរិក លោក Donald Trump បាននិយាយថា អ៊ីរ៉ង់បានយល់ព្រមមិនស្វែង​រក​ការ​ផលិត​អាវុធនុយក្លេអ៊ែរនោះទេ​​ ហើយបញ្ជាក់​ថា លោកទំនងជានឹងជួបជាមួយមេដឹកនាំកំពូល លោក​ Mojtaba Khamenei នៅពេល​ណាមួយ ប្រសិនបើអ្វីៗ «មាន​វឌ្ឍនភាព​យ៉ាងល្អ​ប្រសើរ​»។

ក្នុងបទសម្ភាសន៍មួយដែលត្រូវ​បានចាក់ផ្សាយ នៅ​ថ្ងៃពុធ (ទី៣ ខែមិថុនា ឆ្នាំ២០២៦)​ នេះ ខណៈពេលកំពុងនិយាយអំពីអ៊ីរ៉ង់ លោក Trump បានប្រាប់ប្រព័ន្ធ​ផ្សព្វផ្សាយ​ «Pod Force One» ថា៖ «ពួកគេបានយល់ព្រមរួចហើយថា ពួកគេនឹងមិនមានអាវុធនុយក្លេអ៊ែរនោះ​ទេ»។

ហើយ​នៅពេលត្រូវបាន​សួរអំពីការចូលរួមរបស់លោក Khamenei ក្នុងការចរចាជាមួយសហរដ្ឋអាមេរិក ស្តីពីការបញ្ចប់អរិភាព លោក Trump បាននិយាយថា៖ «រូប​លោក​ (លោក Khamenei) បាន​ពាក់ព័ន្ធពិតមែន​ ហើយខ្ញុំគិតថា ពួកគេមានការគោរពយ៉ាងខ្លាំងចំពោះរូបលោក​»។

លោក Trump បានបន្ត​ថា លោកបានឮថា មេដឹកនាំអ៊ីរ៉ង់ពុំ​សូវមានសុខភាពល្អ​ទេ ប៉ុន្តែកំពុងផ្តល់ការយល់ព្រម ក្នុងអំឡុងពេលចរចា។ លោក Trump បានបន្ថែមថា លោកមិនមាន «សិទ្ធិពិសេសជួប» លោក Khamenei ទេ។ លោក Trump បាននិយាយថា៖ «ខ្ញុំចង់ជួបគាត់។ យើងប្រហែលជានឹងជួបគ្នានៅពេល​ណាមួយ អាស្រ័យលើថា តើ​មាន​វឌ្ឍនភាពល្អប្រសើរ​យ៉ាង​ដូចម្ដេច​»។

ប្រធានាធិបតីអាមេរិករូប​នេះ បាននិយាយថា លោកចាត់ទុកសង្គ្រាមអ៊ីរ៉ង់ថា ជាជោគជ័យមួយ​ ពីព្រោះយោធារបស់ប្រទេសនេះ បាន​រង​បរាជ័យ​។ ជម្លោះ ដែលបានចាប់ផ្តើមជាមួយនឹងការវាយប្រហារ រវាងសហរដ្ឋអាមេរិក និងអ៊ីស្រាអែល កាល​ពីថ្ងៃទី២៨ ខែកុម្ភៈ បានធ្វើឲ្យ​ទីផ្សារថាមពលពិភពលោកមានការប្រែប្រួល ហើយបានបង្ហាញថា ជនជាតិអាមេរិកមិនសូវ​សប្បាយ​ចិត្ត​​ឡើយ ពោល​គឺ​ប៉ុន្មានខែមុនការបោះឆ្នោតសភាខែវិច្ឆិកា៕