វិមានក្រឹមឡាំងនិយាយនៅថ្ងៃពុធនេះថា រុស្ស៊ីនឹងបន្តវាយប្រហារអ៊ុយក្រែនជាប្រព័ន្ធ ក្រោយយានដ្រូនអ៊ុយក្រែនវាយប្រហារចំណតប្រេង និងមូលដ្ឋានទ័ពជើងទឹក ស្ថិតនៅទីក្រុង St Petersburg ពោលគឺរយៈពេលប៉ុន្មានម៉ោងប៉ុណ្ណោះ មុនពេលវេទិកាសេដ្ឋកិច្ចរបស់លោកប្រធានាធិបតី Vladimir Putin ចាប់ផ្តើមដំណើរការ ។

លោក Denis Pushilin គឺជាមេដឹកនាំតំបន់លើកបន្តុបដោយវិមានក្រឹមឡាំងនិយាយថា ការវាយប្រហារយានដ្រូន បានសម្លាប់មនុស្ស ៧នាក់ និងមនុស្ស ១១នាក់ផ្សេងទៀត រងរបួស នៅតំបន់ Donetsk របស់អ៊ុយក្រែនដែលគ្រប់គ្រងដោយរុស្ស៊ី នាថ្ងៃពុធនេះ ។ លោកបន្តថា យានដ្រូនបានវាយប្រហាររថយន្តក្រុងដឹកអ្នកដំណើរមួយគ្រឿងដែលកំពុងធ្វើដំណើរពីទីក្រុងមូស្គូទៅកាន់ទីក្រុង Simferopol ស្ថិតក្នុងតំបន់គ្រីមៀ កាន់កាប់ដោយរុស្ស៊ី ។

លោក Dmitry Peskov គឺជាអ្នកនាំពាក្យវិមានក្រឹមឡាំង និយាយប្រាប់ក្រុមអ្នកសារព័ត៌មានថា លោកចង់រំឭកអ្នកពីសេចក្តីថ្លែងការណ៍ចេញដោយក្រសួងការបរទេសរុស្ស៊ីដែលបានថ្លែងថា ការឆ្លើយតបរបស់ពួកយើងនឹងក្លាយជាប្រព័ន្ធ ។

លោកបន្តថា លោកអាចបញ្ជាក់បានថា ប្រតិបត្តិការសឹកពិសេសនៅតែបន្ត ដើម្បីកុំឲ្យការវាយប្រហារបែបនេះកើតឡើងទៀតនៅពេលអនាគត ៕