ក្រុមអាជ្ញាធរឈីលី បានកម្ទេចបណ្តាញលាងលុយកខ្វក់ដែលមានទំនាក់ទំនងជាមួយក្រុមឧក្រិដ្ឋជន Tren de Aragua ដោយឃាត់ខ្លួនជនសង្ស័យបាន ១៩នាក់ រួមទាំងនិយោជិកធនាគារម្នាក់ផងដែរ ។

ប្រតិបត្តិការនេះ ជាលទ្ធផលនៃការស៊ើបអង្កេតដែលបានធ្វើឡើងរួមគ្នាកាលពីឆ្នាំ ២០២៤ ដោយនគរបាលស៊ើបអង្កេតឈីលី ។

ក្រុមមន្រ្តីបានវាយឆ្មក់ទីតាំងជាច្រើនកន្លែងនៅទីក្រុង Santiago ក៏ដូចជាសាខាធនាគារ Santander ជាទីដែលនិយោជិកម្នាក់ ត្រូវបានចាប់ខ្លួន ។

អ្នកដែលត្រូវឃាត់ខ្លួនប្រឈមនឹងកាចោទប្រកាន់ជាច្រើនករណី រួមទាំងការជំរិតទារប្រាក់ ការរត់ពន្ធ ការលាងលុយកខ្វក់ និងការជាប់ពាក់ព័ន្ធនឹងបទឧក្រិដ្ឋ ។

លោក Eduardo Cerna គឺជាអគ្គនាយកនគរបាលស៊ើបអង្កេតឈីលី បញ្ជាក់ថា អ្នកដែលត្រូវឃាត់ខ្លួនទាំង ១៩នាក់ គឺជាជនជាតិវេណេស៊ុយអេឡា ។

ក្រុមអាជ្ញាធរនិយាយថា និយោជិកធនាគារដែលត្រូវឃាត់ខ្លួន បានបើកគណនីជាច្រើននៅតាមធនាគារផ្សេងៗគ្នា ដើម្បីចុះប្រតិបត្តិការហិញ្ញវត្ថុតាងនាមឲ្យក្រុម Tren de Aragua ៕