​បាល់ទាត់៖ ​ក្រុម​តោ​ខៀវ Chelsea កំពុង​សម្លឹងមើល​ការផ្ទេរ​ដ៏​គួរ​ឱ្យភ្ញាក់ផ្អើល​ ក្នុង​នាំយក​ខ្សែប្រយុទ្ធ Sergio Aguero ​ពី ​Manchester City។​ ​​សារព័ត៌មាន Daily Mail បាន​ចុះផ្សាយ​ពាក្យសំដី​របស់​ Aguero ​ដែល​លើកឡើងថា គេ​សង្ឃឹមថានឹង​បន្ត​នៅ Premier League នៅ​រដូវ​កាល​​ក្រោយ ​ទោះបី​គាត់​ចាក​ចេញពី Manchester City ក៏ដោយ​។​

​​កិច្ចសន្យា​របស់​ខ្សែប្រយុទ្ធ​អា​ហ្ស​ង់​ទីន​រូបនេះ​ នឹង​ផុតកំណត់​នៅ​ខែមិថុនា​ចុងរដូវ​កាល​នេះ ហើយក៏​គ្មាន​ការពិភាក្សា​ណាមួយ​ត្រូវបាន​ធ្វើឡើង ​ក្នុង​ល័ក្ខខ័ណ្ឌ​ថ្មី​នៃ​ការបន្ត​កិច្ចសន្យា​នោះទេ​។​ ​​គេ​ជឿជាក់ថា Barcelona បាន​ទាក់ទង​ជាមួយ Aguero​ ទាក់ទង​នឹង​ការផ្ទេរ​ដោយ​មិន​គិតថ្លៃ​នេះ​។​ ​​ប៉ុន្តែ​ប្រធាន​ថ្មី​របស់ Barcelona ​លោក Joan Laporta​ នឹងត្រូវ​ប្រកួតប្រជែង​ជាមួយ Paris Saint-Germain និង Chelsea​។ ​​ក្រុម​តោ​ខៀវ Chelsea គឺជា​ក្រុម​ដែលមាន​ការ​កោត​សរសើ​រ​ច្រើន​ លើ​សមត្ថភាព​របស់​កីឡាករ​វ័យ ៣២ឆ្នាំ​រូបនេះ ហើយ​ធ្លាប់បាន​ព្យាយាម​នាំ​យក​មក​កាន់ Stamford Bridge កាលពី​ ១០ឆ្នាំ​មុនពេល Manchester City នាំយក​ពី Atletico Madrid​។​

​​កីឡាករ​សញ្ជាតិ​អា​ហ្ស​ង់​ទីន ​ដែលជា​អ្នករក​គ្រាប់​បាល់​បញ្ចូល​ទី​ច្រើនជាងគេ​របស់ Man City បាន​តស៊ូ​ជាមួយនឹង​ការរង​របួស ​និង​ជំងឺ​នៅ​រដូវ​កាល​នេះ ដែល​ធ្វើ​ឲ្យគេ​បង្ហាញខ្លួន​បានតែ ៥ ប្រកួត​ប៉ុណ្ណោះ​គ្រប់​ក្របខណ្ឌ​។ ​​Sergio Aguero​ បាន​សំដែង​ការមិន​ពេញចិត្ត​ ក្រោយ​បាត់បង់​ឱកាស​នៅលើ​ទីលាន បន្ទាប់ពី​ជា​ពីរ​បួស​ពេញ​លេងតាំងពី​ខែមករា​៕

​អត្ថបទ​៖​នាង សុភា​វុ​ធ