ក្រុម​មនុស្សធម៌របស់អង្គការសហប្រជាជាតិ បាននិយាយកាលពីថ្ងៃពុធថា ទោះបីជាមានការពន្យារពេលយ៉ាងសំខាន់នៅចំណុចត្រួតពិនិត្យថ្មីរបស់អ៊ីស្រាអែលក៏ដោយ ក៏​ដៃគូជំនួយបានប្រមូលសម្ភារៈសំខាន់ៗជាង ១.000 កេស​ សម្រាប់តំបន់ហ្កា​ហ្សា ក្នុងរយៈពេលមួយថ្ងៃ។

ការិយាល័យសម្របសម្រួលកិច្ចការមនុស្សធម៌របស់អង្គការសហប្រជាជាតិ (OCHA) បាននិយាយថា ជំនួយទាំងអស់ ត្រូវ​បាន​យកមក​ដាក់នៅចំណុចឆ្លងកាត់ព្រំដែន Kerem Shalom/Karem Abu Salem កាលពីថ្ងៃអង្គារ រួមមានឧបករណ៍អនាម័យ ក្រណាត់តង់ ភួយ និងថ្នាំពេទ្យ។

OCHA បានបញ្ជាក់​ថា ក្បួនរថយន្តដែលធ្វើដំណើរទៅកាន់ច្រក​​ឆ្លង​ព្រំដែន​ Kerem Shalom/Karem Abu Salem ដើម្បីប្រមូលទំនិញមនុស្សធម៌តាមរយៈចំណុចត្រួតពិនិត្យភាគខាងត្បូងហ្កា​ហ្សា ដែលទើបបង្កើតថ្មី នៅតែជួបប្រទះនឹងការពន្យារពេលយ៉ាងយូរ​។

OCHA បាននិយាយថា កាលពី​ថ្ងៃអង្គា​រ ការកកស្ទះនៅចំណុចត្រួតពិនិត្យថ្មី បានរារាំងរថយន្តដឹកប្រេងឥន្ធនៈចំនួន ៦គ្រឿង មិនឲ្យ​ទៅដល់ច្រកឆ្លង​កាត់ Kerem Shalom ដែលបានកាត់បន្ថយបរិមាណប្រេងឥន្ធនៈ ដែលអាចប្រមូលបានពីច្រក​ឆ្លងកាត់នេះ​»។ «លំហូរប្រេងឥន្ធនៈជាប្រចាំ គឺមានសារៈសំខាន់ណាស់ក្នុងការរក្សាមន្ទីរពេទ្យ រោងចក្រចម្រាញ់ទឹកប្រៃ និងសេវាកម្មទ្រទ្រង់ជីវិតផ្សេងទៀតឲ្យ​ដំណើរការ ក្នុងករណី ដែលគ្មានបណ្តាញអគ្គិសនីដំណើរការ៕