អ្នកការទូតជាន់ខ្ពស់របស់សហភាពអឺរ៉ុប (EU) លោកស្រី​ Kaja Kallas បានប្រាប់សារព័ត៌មាន AFP កាលពី​ថ្ងៃពុធ (ទី៣ ខែមិថុនា ឆ្នាំ២០២៦) ថា ការវាយប្រហារដោយយាន​ដ្រូន​របស់អ៊ុយក្រែន នៅក្នុងប្រទេសរុស្ស៊ី កំពុងបង្កឲ្យ​មាន «ការភ័យស្លន់ស្លោ» សម្រាប់វិមានក្រឹមឡាំង ដោយបញ្ជាក់​ថា ទីក្រុងមូស្គូកំពុងមាន​ប្រតិបត្តិការ​លើ​ទីក្រុងគីវ ដោយ​បង្កើន​ការវាយប្រហារកាន់តែខ្លាំងឡើងៗ។

យាន​ដ្រូន​របស់អ៊ុយក្រែន បានវាយប្រហារទីតាំងថាមពល និងយោធា នៅទីក្រុង Saint Petersburg កាលពី​ថ្ងៃទី៣ ខែមិថុនា ខណៈដែលមន្ត្រីបានជួប​ជុំ​គ្នា សម្រាប់សន្និសីទសេដ្ឋកិច្ចដ៏សំខាន់របស់ប្រធានាធិបតីរុស្ស៊ី លោក Vladimir Putin នៅក្នុងទីក្រុងនេះ​។

លោកស្រី Kallas បាននិយាយនៅក្នុងបទសម្ភាសន៍មួយថា៖ «វាបង្ហាញយ៉ាងច្បាស់ពីភាពភ័យស្លន់ស្លោ នៅខាងរុស្ស៊ីផងដែរ។ ហើយ​ហេតុអ្វីបានជាពួកគេកំពុងបង្កើនការវាយប្រហារភេរវកម្មដែលពួកគេកំពុងធ្វើ នៅអ៊ុយក្រែន គឺដោយសារតែពួកគេមិនដឹងថា ត្រូវធ្វើអ្វីជាមួយរឿងទាំងនេះ»។

ប្រធានាធិបតីអ៊ុយក្រែន លោក Volodymyr Zelensky បានពិពណ៌នា អំពីការវាយប្រហារទាំងនោះថា ជាការសងសឹក «ដ៏​យុត្តិធម៌» ចំពោះការទម្លាក់គ្រាប់បែករបស់រុស្ស៊ី លើអ៊ុយក្រែន ហើយបានគំរាមកំហែងថានឹងចាប់ផ្តើមបន្ថែមទៀត។

លោកស្រី​ Kallas បានបញ្ជាក់​ថា៖ «អ៊ុយក្រែនពិតជាបានបង្កើនការវាយប្រហារចូល​ជ្រៅ លើ​រោងចក្រប្រេង ពីព្រោះប្រេង គឺជាប្រភព​ផ្តល់ហិរញ្ញប្បទានដល់សង្គ្រាម នៅអ៊ុយក្រែន។ ក្នុងពេលជាមួយគ្នានេះ យើងឃើញថា លោក Putin កំពុងបាត់​បង់ហិរញ្ញវត្ថុ​ ​មនុស្ស និងសន្ទុះ ហើយនោះហើយជាមូលហេតុដែលរូប​លោក​កំពុងបង្កើនការវាយប្រហារលើជនស៊ីវិល»។

មេដឹកនាំរុស្ស៊ីបានបើក​ការវាយប្រហារដោយយាន​ដ្រូន​ និងមីស៊ីលដ៏សាហាវជាបន្តបន្ទាប់ លើ​អ៊ុយក្រែនក្នុងរយៈពេលប៉ុន្មានថ្ងៃថ្មីៗនេះ ដោយបានសម្លាប់មនុស្សយ៉ាងហោចណាស់ ២៣នាក់ កាល​ពី​ថ្ងៃទី២ ខែមិថុនា។ ហើយ​លោកស្រី Kallas បាននិយាយថា៖ «គាត់ (លោក Putin)​ច្បាស់ជាកំពុងបំភិតបំភ័យបន្ថែមទៀត ដើម្បីបង្កើតការភ័យខ្លាច និង​ដោយសារតែលោក​កំពុងជួប​បញ្ហានៅក្នុងសមរភូមិនេះ​»៕