​បាល់ទាត់៖ ​ក្រុម​ជើងឯក​ថៃ BG Pathum United បាន​បន្ត​ទំរង់​លេង​អស្ចារ្យ​ក្នុងការ​បង្ហាញខ្លួន​ដំបូង​នៅ AFC Champions League ក្រោយ​យកឈ្នះ​ក្រុម​ហ្វីលីពីន United City ៥-០ មិនទាន់​ចាញ់​ក្នុង​ពូ​ល​។

​​បន្ទាប់ពី​ស្មើ​ក្រុម​អូស្ត្រាលី Melbourne City ១-១ ប្រកួត​ដំបូង និង​ឈ្នះ​ក្រុម​កូរ៉េ Jeonnam Dragons ២-០ បូក​រួមទាំង​ជ័យជំនះ​លើ United City នេះ​ទៀត BG Pathum United នៅពេលនេះ​ឈ្នះ ២ ស្មើ​មួយ​ឈរ​លេខ ២ ក្នុង​ពូ​ល G មាន ៧ពិន្ទុ​ស្មើគ្នា​ជាមួយ Melbourne City ដែល​យកឈ្នះ Jeonnam Dragons យប់មិញ​ផងដែរ​។ ​​អតីត​ខ្សែការពារ Arsenal, Carl Jenkinson និង Andrew Nabbout រកបាន​ម្នាក់​មួយគ្រា​ប់​សំរាប់ Melbourne City ខណៈ Jeonnam រកបាន​ដោយ Kyu-Hyeok Lee​។ ​​Jeonnam Dragons បន្ត​ឈរ​លេខ ៣ មាន ៣ពិន្ទុ​ខណៈ United City មាន​សូន្យ​ពិន្ទុ​។ ​​ងាក​មក​ពូ​ល F វិញ ក្រុម​កូរ៉េ Daegu FC ឡើងមក​ឈរលើ​គេ​ក្នុង​ពូ​ល​ក្រោយ​យកឈ្នះ​ក្រុម​ជប៉ុន Urawa Red Diamonds ១-០​។

​​ពូ​ល​នេះ Daegu FC មាន ៦ពិន្ទុ​ស្មើគ្នា​ជាមួយ Urawa Red Diamonds ខណៈដែល​មួយគូ​ទៀត​ក្រុម​ចិន Shandong Taishan មាន​ពិន្ទុ​រាប់​ហើយ​ក្រោយ​ស្មើគ្នា​ជាមួយ​ក្រុម​សិង្ហ​បុរី Lion City Sailors ០-០ ខណៈដែល Lion City ឈរ​លេខ ៣ មាន ៤ពិន្ទុ​។ ​​ចំណែកឯ​ពូ​ល I Ulsan Hyundai បាន​យកឈ្នះ​ក្រុម​ចិន Guangzhou FC ៣-០ តែ​បន្ត​ឈរ​លេខ ៣ ក្នុង​ពូ​ល​មាន ៤ពិន្ទុ ខណៈ​មួយគូ​ទៀត Kawasaki Frontale និង Johor Darul Ta’Zim ចែក​ពិន្ទុ​គ្នា​ក្រោយ​ស្មើគ្នា ០-០​។ ​ក្លិប​ម៉ាឡេស៊ី JDT បន្ត​នាំមុខគេ​មាន ៧ពិន្ទុ​តាម​ពីក្រោយ​ដោយ Kawasaki មាន ៥ពិន្ទុ​៕

​អត្ថបទ​៖​នាង សុភា​វុ​ធ