ក្រុមសម្ព័ន្ធមិត្តអឺរ៉ុបសំខាន់ៗរបស់​ប្រទេស​អ៊ុយក្រែន កំពុងធ្វើការលើផែនការជាមួយទីក្រុងគីវ ដើម្បីចូលរួមជាមួយរុស្ស៊ី នៅ​ក្នុងការចរចា ដើម្បីបញ្ចប់សង្គ្រាម ខណៈដែលពួកគេឃើញសន្ទុះផ្លាស់ប្តូរ ដែលជួយ​ពង្រឹងជំហររបស់ប្រធានាធិបតី លោក Volodymyr Zelensky។

បើយោងតាមប្រភពដែលដឹង​ពី​បញ្ហានេះ បាន​ឲ្យ​ដឹង​ថា មន្ត្រីមកពីប្រទេសសេដ្ឋកិច្ចធំបំផុតទាំង៣ របស់តំបន់​អឺរ៉ុប គឺអាល្លឺម៉ង់ បារាំង និងអង់គ្លេស បានពិភាក្សាអំពីលទ្ធភាពនៃការធ្វើកិច្ចពិភាក្សាដែលពាក់ព័ន្ធនឹងភាគីទាំង២។ ប្រភពដែលបាននិយាយក្នុងលក្ខខណ្ឌមិន​បញ្ចេញ​ឈ្មោះ​ ដោយ​សារ​នេះ​ជា​កាពិភាក្សា​សម្ងាត់​ បាន​បញ្ជាក់ថា មន្ត្រី​ទាំង​នោះ​ក៏បានពិភាក្សាផង​ដែរ ​អំពីបញ្ហានេះ ជាមួយ​សមភាគីអ៊ុយក្រែនរបស់ពួកគេផងដែរ។

អ្នកនាំពាក្យរបស់បារាំង និងអង់គ្លេស មិនបានឆ្លើយតបភ្លាមៗនោះទេ​ ចំពោះសំណើសុំការអត្ថាធិប្បាយ។ ហើយ​អ្នកនាំពាក្យរដ្ឋាភិបាលអាល្លឺម៉ង់មួយ​រូប បានបដិសេធមិនធ្វើអត្ថាធិប្បាយអ្វី​ឡើយ ចំពោះ​ព័ត៌មាន​នេះ​។

យ៉ាង​ណាក្ដី ប្រភព​នោះ​បាន​បន្ថែម​ថា ដោយសារកិច្ចពិភាក្សាដឹកនាំដោយសហរដ្ឋអាមេរិកជាប់គាំង និងកងកម្លាំងរុស្ស៊ីកំពុងរងការខាតបង់កាន់តែច្រើនឡើងៗ ក្នុងពេល​មិន​មាន​ប្រៀប នៅ​សមរភូមិ ប្រទេសទាំង៣ មើលឃើញឱកាសដែកលអាច​នាំឲ្យ​លោក​ប្រធានាធិបតីរុស្ស៊ី Vladimir Putin ទៅ​កាន់តុចរចា៕