មហាសន្និបាតអង្គការសហប្រជាជាតិកាលពីថ្ងៃពុធ ទី៣ ខែមិថុនា បានជ្រើសរើសប្រទេសអូទ្រីស កៀហ្ស៊ីស៊ីស្ថាន ព័រទុយហ្គាល់ ទ្រីនីដាដ តូបាហ្គោ និងហ្ស៊ីមបាវ៉េ ឲ្យចូលក្នុងក្រុមប្រឹក្សាសន្តិសុខអង្គការសហប្រជាជាតិដែលមានសមាជិក១៥ប្រទេសសម្រាប់អាណត្តិពីរឆ្នាំ ដោយចាប់ផ្តើមពីថ្ងៃទី១ ខែមករា ឆ្នាំ ២០២៧។

ប្រទេសអាល្លឺម៉ង់ ដែលបានតស៊ូមតិយ៉ាងខ្លាំងដើម្បីបានអសនៈ ធ្លាក់មកនៅចំណាត់ថ្នាក់ទីបីសម្រាប់កន្លែងចំនួនពីរដែលត្រូវបានប្រជែងដោយក្រុមអឺរ៉ុបខាងលិច និងក្រុមផ្សេងទៀត ដោយមានសំឡេងគាំទ្រ១០៤ ទល់នឹង១៣៤សម្រាប់ប្រទេសព័រទុយហ្គាល់ និង១៣១សម្រាប់ប្រទេសអូទ្រីស។

ការប្រកួតប្រជែងរវាងប្រទេសហ្វីលីពីន និងកៀហ្ស៊ីស៊ីស្ថានសម្រាប់អសនៈក្រុមអាស៊ី-ប៉ាស៊ីហ្វិក បានឈានដល់ការបោះឆ្នោតចំនួនបួនជុំ ដោយប្រទេសកៀហ្ស៊ីស៊ីស្ថាននៅទីបំផុតទទួលបានសំឡេងភាគច្រើនពីរភាគបីដែលចាំបាច់ និងទទួលបានអសនៈក្រុមប្រឹក្សាសន្តិសុខលើកដំបូងរបស់ខ្លួនដោយសំឡេងគាំទ្រ១៤២ ទល់នឹង៤៩សំឡេង។

ក្រុមប្រឹក្សាសន្តិសុខ គឺជាស្ថាប័នអង្គការសហប្រជាជាតិតែមួយគត់អាចធ្វើការសម្រេចចិត្តដែលមានចំណងផ្លូវច្បាប់ស្របច្បាប់ ដូចជាការដាក់ទណ្ឌកម្មនិងការអនុញ្ញាតឱ្យប្រើប្រាស់កម្លាំង។

ស្ថាប័ននេះមានសមាជិកអចិន្ត្រៃយ៍ចំនួនប្រាំដែលមានសិទ្ធិវេតូ មាន ចក្រភពអង់គ្លេស ចិន បារាំង រុស្ស៊ី និងសហរដ្ឋអាមេរិក។