ភ្នំពេញ៖ ប្រធានសហព័ន្ធសហជីពសម្លេងយុវជនខ្មែរ បានលើកឡើងថា រហូតមកដល់ពេលនេះ រោងចក្រ សហគ្រាស នៅរាជធានីខេត្តមួយចំនួន បានពិភាក្សាជាមួយអ្នកជំនាញ​ចាក់វ៉ាក់សាំងបង្ការកូវីដ១៩ ដើម្បីកំណត់ពេលវេលាចាក់វ៉ាក់សាំងដូសជំរុញ ដល់បងប្អូនកម្មករនិយោជិត ទៅតាមអនុសាសន៍ណែនាំរបស់ប្រមុខរាជរដ្ឋាភិបាល ។

ឯកឧត្តម ឡុង សុផាត ប្រធានសហព័ន្ធសហជីពសម្លេងយុវជនខ្មែរ បានមានប្រសាសន៍ប្រាប់​ទូរទស្សន៍ព័ត៌មានប៊ីធីវីថា បន្ទាប់ពីការអំពាវនាវរបស់រាជរដ្ឋាភិបាលឲ្យប្រជាពលរដ្ឋ ក៏ដូចជាកម្មករ កម្មការិនីទៅទទួលវ៉ាក់សាំងបង្ការ កូវីដ ឃើញមានរោងចក្រ សហគ្រាសជាច្រើន បានកំពុង​បញ្ជូន​ឈ្មោះកម្មករនិយោជិត ​និងជាបន្តបន្ទាប់ហើយ ​តាមរយៈគ្រុប (តេឡេក្រាម) ដើម្បីត្រៀម​ទទួល​វ៉ាក់សាំងនេះ។

លោក ម៉ាន់ សាលីន រដ្ឋបាល​រោងចក្រ​កាត់ដេរ​សំលៀកបំពាក់ ញូអេសថ៍ ហ្គាម៉ិន ខេមបូឌា (NEWEST GARMENT CAMBODIA Co,.LTD) ​ស្ថិតនៅខណ្ឌពោធិ៍សែន ​រាជធានីភ្នំពេញ បាន​ឲ្យប៊ីធីវីដឹងថា ​ក្នុងរោងចក្រ​លោក​ មានកម្មករនិយោជិត​សរុប​ប្រមាណជាង ​៥០០នាក់ បាន​ស្ម័គ្រចិត្ត​និងចុះឈ្មោះរួចរាល់ហើយ ​ដើម្បីត្រៀមចាក់វ៉ាក់សាំងបង្ការកូវីដ ខណៈបច្ចុប្បន្ននេះ ពួកគាត់​បាន​ចាក់​ដល់​ដូសទី៣។

ជាមួយគ្នានេះ កម្មករ កម្មការិនី នៃរោងចក្រកាត់ដេរខាងលើ ​បានសម្តែងការដឹងគុណ និង​អរគុណ​ដល់មន្រ្តីគ្រប់ ជាន់ថ្នាក់នៃរដ្ឋាភិបាលកម្ពុជា​ ជាពិសេសសម្តេច​នាយករដ្ឋមន្រ្តីតេជោ ​ហ៊ុន សែន ដែល​លោក​តែងតែគិតគូរយកចិត្ត ​ទុកដាក់ជាប់ជានិច្ចជាមួយបងប្អូនកម្មករ និងបានជូនពរ​សម្តេច​មានសុខភាពល្អរឹងមាំ​ ដើម្បីគង់ជាម្លប់ និងដឹកនាំប្រទេសជាតិកាន់តែរីកចម្រើនតទៅមុខថែមទៀត។

ក្រសួងការងារ និងបណ្ដុះបណ្ដាលវិជ្ជាជីវៈ ក៏បានចេញសេចក្តីជូនដំណឹងបន្ថែម ដើម្បីក្រើន រំលឹក​ដល់ម្ចាស់ ឬនាយករោងចក្រ ​សហគ្រាសទាំងអស់​ ត្រូវសហការជាបន្ទាន់ជាមួយអាជ្ញាធរមូលដ្ឋាន រាជធានី ខេត្ត និងមន្ទីរការងារ ​និងបណ្តុះបណ្តាលវិជ្ជាជីវៈរាជធានី ខេត្ត ដើម្បីរៀបចំចាក់វ៉ាក់សាំង​ដូសជំរុញជូនកម្មករ និយោជិតនៅតាមរោងចក្រ សហគ្រាស​ ក្នុងគោលដៅបន្តប្រយុទ្ធ និង​ទប់ស្កាត់​ការឆ្លងរាលដាលជំងឺកូវីដ១៩ ​ដែល​បំប្លែងខ្លួនថ្មី អូមីក្រុង៕ អត្ថបទ ឈិត បូរ៉ាវី