ក្រុមបាតុករនៅម៉ិកស៊ិក កាល​ពី​ថ្ងៃពុធ (ទី៣ ខែមិថុនា ឆ្នាំ២០២៦) បានលុកលុយ​ភ្លាមៗ​ចូល​អគារមួយរបស់​រដ្ឋាភិបាល ដោយ​ហេតុការណ៍​នេះ​កើត​ឡើង​តែ​ប៉ុន្មានថ្ងៃប៉ុណ្ណោះ មុនការបើកព្រឹត្តិការណ៍បាល់ទាត់ពិភពលោក (World Cup) ខណៈដែលប្រធានាធិបតី លោកស្រី​ Claudia Sheinbaum បានទទូចថា លោកស្រី នឹងមិន «ធ្លាក់ចូលទៅក្នុងអន្ទាក់» ដោយ​ធ្វើ​​ការបង្ក្រាបលើ​បាតុកម្មនោះឡើយ​។

ក្រុមផ្សេង​មួយក្រុមមកពីអង្គការសម្របសម្រួលជាតិនៃបុគ្គលិក​អប់រំ (CNTE) បានធ្វើមហា​បាតុកម្ម មុនការ​ប្រកួត​បាល់ទាត់ដ៏ធំបំផុតរបស់ពិភពលោក ដែលនឹងចាប់ផ្តើមនៅថ្ងៃទី១១ ខែមិថុនា នៅពហុកីឡដ្ឋាន Azteca របស់​​ទីក្រុង Mexico City។ នៅថ្ងៃពុធនោះ​ ក្រុមបាតុករនេះ​បានប្រើបង្គោលភ្លើងបំភ្លឺតាមដងផ្លូវជាឧបករណ៍ ដើម្បីសម្រុក​ចូលទៅក្នុងទីស្នាក់ការកណ្តាលរបស់ក្រសួងអប់រំ នៅក្នុងរដ្ឋធានីនេះ​។ ប្រភពពីអគារគោល​ដៅ​នេះ បាននិយាយថា ក្រុមបាតុករបានបំផ្លាញស្តង់យាម និងវាយ​បំបែកបង្អួច ខណៈដែលរូបភាពដែលចាក់ផ្សាយនៅលើទូរទស្សន៍ម៉ិកស៊ិក បង្ហាញពីអគ្គិភ័យ​ដ៏​តូចមួយ​ឆាប​ឆេះនៅទីតាំងនោះ។

លោកស្រី Sheinbaum បាននិយាយកាលពីថ្ងៃពុធថា លោកស្រីនឹងមិន «ធ្លាក់ចូលទៅក្នុងអន្ទាក់» ដោយ​ធ្វើ​ការបង្ក្រាបលើ​ការតវ៉ាឡើយ​ ពោល​គឺ​ប៉ុន្មានថ្ងៃមុនពេលចាប់ផ្តើមព្រឹត្តិការណ៍​ ដែលត្រូវធ្វើ​​ម្ចាស់ផ្ទះរួមគ្នាដោយសហរដ្ឋអាមេរិក កាណាដា និងម៉ិកស៊ិក។

កាល​ពី​ថ្ងៃអង្គារ គ្រូបង្រៀនដែលកំពុងតវ៉ា បានរំលំរូបសំណាកកីឡាករបាល់ទាត់ដ៏ខ្ពស់ៗ នៅលើផ្លូវដ៏​សំខាន់របស់រដ្ឋធានី និងបានគំរាមកំហែងតវ៉ា ក្នុងអំឡុងពេលមាន​ព្រឹត្តិការណ៍ World Cup ប្រសិនបើរដ្ឋាភិបាលមិនឆ្លើយតបទៅនឹងការទាមទារលក្ខខណ្ឌ​ការងាររបស់ពួកគេទេ។

កាល​ពី​ថ្ងៃចន្ទ នគរបាល​បានបាញ់ឧស្ម័នបង្ហូរទឹកភ្នែក លើក្រុមគ្រូបង្រៀន ដើម្បីរារាំងពួកគេមិនឲ្យ​ចូល​ទៅដល់ទីលាន Zocalo។ ប៉ុន្តែនៅថ្ងៃអង្គារ អាជ្ញាធរមិនបានធ្វើអន្តរាគមន៍ទេ នៅពេលដែលក្រុមបាតុករ បានផ្តួលរំលំរូបសំណាកកម្ពស់ ៥​ម៉ែត្រនោះ​៕