សហភាពអឺរ៉ុប (EU) កាលពី​ថ្ងៃពុធ (ទី៣ ខែមិថុនា ឆ្នាំ២០២៦) បានយល់ព្រមជំរុញប្រទេស​អ៊ុយក្រែន និងម៉ុលដាវី ទៅកាន់ដំណាក់កាលបន្ទាប់ សម្រាប់​កិច្ច​ប្រឹង​ប្រែង​ចូលជាសមាជិករបស់ពួកគេ ខណៈដែលអ្នកការទូត បាននិយាយថា ហុងគ្រីបានបង្ហាញសញ្ញាទម្លាក់​សិទ្ធិវេតូយូរអង្វែងរបស់ខ្លួន ប្រឆាំងនឹងទីក្រុងគីវ​។

ប្រទេសស៊ីប ដែលកាន់តំណែងជាប្រធានប្តូរវេន បានឲ្យ​ដឹង​តាម​រយៈការ​បង្ហោះ​លើ​បណ្ដាញ​សង្គមថា៖ «នេះគឺជាដំណាក់កាល​ដ៏សំខាន់មួយ នៅលើ​មាគ៌ា​ឆ្ពោះ​ទៅ​ការ​ធ្វើសមាហរណកម្មអឺរ៉ុបរបស់ប្រទេស​ទាំង២ ហើយផ្ញើសារដ៏រឹងមាំមួយពី​ការមាន​ឯកភាព និងការតាំងចិត្តរបស់ EU»។

EU បានបើកការចរចាពី​ចូលជា​សមាជិក​ជាផ្លូវការជាមួយអ៊ុយក្រែន នៅក្នុងខែមិថុនា ឆ្នាំ២០២៤ ដោយចាប់ផ្តើមកិច្ចការដ៏ស្មុគស្មាញមួយដែលជាធម្មតាចំណាយពេលច្រើនឆ្នាំ និងពាក់ព័ន្ធនឹងការចរចាលើអ្វីៗគ្រប់យ៉ាង រាប់​ចាប់ពីកសិកម្ម រហូតដល់នីតិរដ្ឋ។

ប៉ុន្តែការ​ពិភាក្សានោះ គឺភាគច្រើ​ន​ជាចំណាត់​ការ​និមិត្តរូប ហើយការចាប់ផ្តើមដំណើរការនេះដោយ​ជាក់ស្ដែង ត្រូវបានពន្យារពេលដោយអតីតនាយករដ្ឋមន្ត្រីហុងគ្រី លោក Viktor Orban ចាប់តាំងពីពេលនោះមក​។

តែ​បន្ទាប់ពីលោក Orban បាន​បាត់បង់​អំណាច ក្នុងខែមេសា នាយករដ្ឋមន្ត្រីថ្មីរបស់ហុងគ្រី លោក Peter Magyar បានលើក​ឡើង​ថា លោកនឹងរីករាយក្នុងការជំរុញទៅ​មុខ​ដល់​​កិច្ច​ប្រឹង​ប្រែង​ចូលជាសមាជិករបស់អ៊ុយក្រែន នៅពេលដែលបញ្ហានៅសេសសល់របស់ទីក្រុង Budapest ជាមួយទីក្រុងគីវ ត្រូវបានដោះស្រាយចប់សព្វគ្រប់​​៕