ភ្នំពេញ៖ ឯកឧត្តមវេជ្ជបណ្ឌិត ងី មានហេង ប្រធានមនី្ទរសុខាភិបាល រាជធានីភ្នំពេញ ប្រាប់BTV ព័ត៌មានថា បងប្អូនប្រជាពលរដ្ឋអាយុចាប់ពី១៨ឆ្នាំ ដែលរស់នៅក្នុងមូលដ្ឋានរាជធានីភ្នំពេញ គិតត្រឹមព្រឹកថ្ងៃទី២២ ខែមេសា ឆ្នាំ២០២២នេះ បានមកទទួលវ៉ាក់សាំងបង្ការជំងឺកូវីដ-១៩ ដូសជំរុញទី៣ បានចំនួន ៩៩,៦៥% និងដូសជំរុញទី៤ បានចំនួនជិត៦២%។
ឯកឧត្តមវេជ្ជបណ្ឌិត ងី មានហេង បន្តទៀតថា បច្ចុប្បន្នក្រៅពីតាំងដែលមានសម្រាប់កំពុងដំណើរការផ្តល់សេវាចាក់វ៉ាក់សាំងកូវីដ-១៩ ទាំង៤២ទីតាំង គឺមន្រី្តសុខាភិបាល នៃការិយាល័យស្រុកប្រតិបតិ្តទាំងអស់ បានសហការជាមួយអាជ្ញាធរភូមិ សង្កាត់ គ្រប់ខណ្ឌ ចុះចាក់វ៉ាក់សាំងបង្ការជំងឺកូវីដ-១៩ ជូនបងប្អូនប្រជាពលរដ្ឋ ដែលរស់នៅក្នុងតំបន់មិនរៀបរយពីផ្ទះមួយ ទៅផ្ទះមួយ។
ក្រៅពីនោះ មន្ទីរ ក៏កំពុងសហការជាមួយមន្រី្តការិយាល័យអប់រំខណ្ឌ ដើម្បីចុះចាក់វ៉ាក់សាំងជូនដល់ប្អូនៗ សិស្សានុសិស្សតាមសាលារៀន ហើយការចាក់វ៉ាក់សាំងតាមសាលារៀននេះ គឺមន្រី្តសុខាភិបាល ចុះចាក់វ៉ាក់សាំងជូនសិស្សនៅសាលាបឋមសិក្សា។
ដោយឡែកសិស្ស នៅអនុវិទ្យាល័យ គឺបានចាក់វ៉ាក់សាំងបង្ការជំងឺកូវីដ-១៩ ដូសជំរុញទី៣ បានគ្រប់ចំនួនហើយ។ ដូច្នេះអ្នកដែលខ្វះ គឺសិស្សានុសិស្ស នៅសាលាបឋមសិក្សាប៉ុណ្ណោះ។
បើតាមឯកឧត្តម សាស្រ្តាចារ្យ ម៉ម ប៊ុនហេង រដ្ឋមន្រី្តក្រសួងសុខាភិបាល បានបញ្ជាក់ថា រហូតមកដល់ពេលនេះ កម្ពុជាគ្រប់គ្រងបានការឆ្លងរាតត្បាតនៃជំងឺកូវីដ-១៩ ក្នុងសហគមន៍ និងហានិភ័យសុខភាពសាធារណៈ ដោយបន្តពង្រឹងភាពធន់ប្រព័ន្ធសុខាភិបាល ដែលមិនគ្រាន់តែ ដើម្បីគ្រប់គ្រងការរាតត្បាតជំងឺកូវីដ-១៩ បច្ចុប្បន្នប៉ុណ្ណោះទេ ប៉ុន្តែក៏ត្រៀមលក្ខណៈទុកជាមុនផងដែរ ដើម្បីឆ្លើយតបនឹងមេរោគកូវីដ-១៩ បំប្លែងខ្លួនថ្មី ការផ្ទុះឡើងនៃជំងឺឆ្លងកាចសាហាវផ្សេងទៀត និងការគម្រាមកំហែងសុខភាពសាធារណៈនានា ដែលអាចកើតមានជាយថាហេតុក្នុងពេលអនាគត។
ទន្ទឹមគ្នានេះ ប្រព័ន្ធសុខាភិបាល កំពុងបន្តលើកកម្ពស់ការផ្តល់សេវាថែទាំសុខភាពទូទៅ មានគុណភាព សុវតិ្ថភាព និងប្រសិទ្ធភាព ប្រកបដោយសមធម៌ ជូនប្រជាពលរដ្ឋកម្ពុជា នៅក្នុងបរិបទនៃការរស់នៅជាមួយមេរោគកូវីដ-១៩ និងកំពុងបន្តជំរុញវឌ្ឍនភាពឆ្ពោះទៅកាន់ការគ្របដណ្តប់សុខភាពជាសកលនៅឆ្នាំ២០៣០៕អត្ថបទ៖ រដ្ឋា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
